وفاقی کابینہ نے ای او بی آئی کی پنشنز میں اضافے کی منظوری دے دی ہے۔

وزیراعظم عمران خان کی زیر صدارت وفاقی کابینہ کا اجلاس ہوا، جس میں ایمپلائز اولڈ ایج بینیفٹس انسٹی ٹیوشن (ای او بی آئی) کی پنشن میں اضافے کی منظوری دے گئی۔

ذرائع کے مطابق ای او بی آئی پنشنرز کو اب 6500 نہیں 8500 روپے ملیں گے۔

اجلاس میں معاون خصوصی ذلفی بخاری نے تنخواہوں میں اضافے سے متعلق بریفنگ دی جبکہ وزارت اوورسیز نے 2000 روپے اضافے کی تجویز دی تھی۔

ذرائع نے بتایا کہ وفاقی کابینہ نے ای او بی آئی پنشنرز کی پنشنز میں 2000 روپے اضافے کی منظوری دے دی، پنشنز میں اضافے کا اطلاق جنوری 2020 سے ہوگا۔

واضح رہے کہ 12 دسمبر 2019 کو وزیراعظم عمران خان نے ای او بی آئی کے تحت پنشن لینے والے افراد کی کم سے کم پنشن ساڑھے 6 ہزار روپے سے بڑھا کر ساڑھے 8 ہزار روپے کرنے کا اعلان کیا تھا۔

وفاقی کابینہ نے پاکستان اسٹاک ایکسچینج حملے کی مذمت بھی کرتے ہوئے پولیس، رینجرز اور سیکیورٹی گارڈز کی بروقت کارروائی کی تعریف کی اور شہداء کی جرات و بہادری کو خراج تحسین پیش کیا۔