پاکستان کے صدر پاکستان ڈاکٹرعارف علوی نے گلوکارہ حدیقہ کیانی کی تعریف کر دی۔

ڈاکٹر عارف علوی نے سماجی رابطے کی سائٹ پر پاکستان میوزک انڈسٹری کی مقبول ترین اور عالمی شہرت یافتہ گلوکارہ حدیقہ کیانی کے کشمیریوں کے لیے گائے گانے کی تعریف کردی۔

گلوکارہ حدیقہ کیانی نے فوٹو اور ویڈیو شیئرنگ ایپ انسٹاگرام پر ڈاکٹر عارف علوی کے تعریفی پیغام کی ایک تصویر شیئر کی ہے۔

See more

صدر پاکستان ڈاکٹر عارف علوی نے اپنے پیغام میں کہا کشمیر کے مظلوم عوام کی جدوجہد کی عکاسی کرتا یہ ایک بہترین گانا ہے۔

ڈاکٹر عارف علوی نے کہا کہ انشاء اللہ کشمیریوں کے خواب، جیسا کہ اس گانے میں بتائے گئے ہیں، ایک دن حقیقت ہوں گے۔

صدر پاکستان نے مزید کہا کہ یہ واقعی ایک دل کو گرما دینے والا گانا ہے۔

انہوں نے کہا کہ کشمیریوں پر جو بھارت ظلم و ستم، قتل و غارت کررہا ہے اُس کا خاتمہ ہوگا اور کشمیر آزاد ہوگا۔

دوسری جانب صدر پاکستان ڈاکٹر عارف علوی کی جانب سے کی جانے والی اس پوسٹ کے ساتھ ہی کیپشن میں حدیقہ کیانی نے لکھا کہ میں اُن تمام لوگوں کی بےحد شکر گزار ہوں جنہوں نے اس گانے کو پسند کیا اور مجھے سپورٹ کیا۔

گلوکارہ حدیقہ کیانی نے لکھا کہ میں ایک گلوکارہ ہوں اور میں صرف یہ کرسکتی ہوں کہ اس پلیٹ فارم کا استعمال کرتے ہوئے مظلوموں میں شعور اُجاگر کرنے کے لیے اپنی آواز بلند کا استعمال کروں۔

اس کے علاوہ  گلوکارہ نے اپنی اس پوسٹ میں اپنے ساتھی ترک فنکاروں کا بھی شکریہ ادا کیا ہے۔

حدیقہ کیانی نے لکھا کہ ہم صرف ایک گانا گا کر نہیں رک سکتے بلکہ ہمیں کشمیریوں کی آواز سننے کی بھی ضرورت ہے۔

انہوں نے مزید کہا کہ کشمیری فنکاروں کے ساتھ بھی گانا گانے کی خواہش کا اظہار کیا ہے اور کہا کہ مجھے اُمید ہے کہ مظلوموں کے لیے بلند کی گئی میری آواز عالمی رہنماؤں تک پہنچے گی اور وہ اس سلسلے میں مدد کریں گے۔

خیال رہے کہ گلوکارہ نے اپنی پوسٹ کے آخر میں مزید لکھا کہ ہمیں انصاف، امن اور محبت کی ضرورت ہے۔

یاد رہے کہ گانے کی ویڈیو میں شہدائے کشمیر کی تصاویر اور مقبوضہ کشمیر میں جاری بھارتی فوج کے مظالم کو دکھایا گیا ہے۔

پاکستانی گلوکارہ حدیقہ کیانی نے اس گانے میں شہدائے کشمیر کو خراج عقیدت پیش کیا تھا۔

دلچسپ بات یہ ہے کہ حدیقہ کیانی اور تُرک فنکاروں کا یہ گانا تین مختلف زبانوں میں جاری کیا گیا ہے جن میں اُردو، ترکش اور کشمیری زبان شامل ہے جبکہ گانے کا دورانیہ 3 منٹ 37 سیکنڈز ہے۔

واضح رہے کہ 13جولائی یوم شہدائے کشمیر کے موقع پر حدیقہ کیانی نے تُرک فنکار علی ٹولگا ڈیمرٹاس اور ٹورگی ایورین کے ساتھ مل کر خصوصی گانا جاری کیا تھا۔