صدرپی ٹی آئی کراچی خرم شیرزمان نے کہا ہے کہ سندھ حکومت کے سب سے نالائق اور نااہل وزیر وزیر بلدیات ہیں۔

تفصیلات کے مطابق صدرپی ٹی آئی کراچی خرم شیرزمان نےاپنے ایک بیان میں کہا کہ بارش کے بعد سندھ حکومت کی روائتی غفلت نظر آرہی ہے۔

اپنے بیان میں خرم شیرزمان کا کہنا تھا کہ سندھ حکومت نے کراچی کی قسمت میں ڈوبنا لکھ دیا ہے جبکہ اپنی کارکردگی درست کرنے کی بجاء دوسرے صوبوں کو تنقید کا نشانہ بنایا جارہا ہے۔

صدرپی ٹی آئی کراچی نے کہا کہ سندھ حکومت 4 وزیر بلدیات ہونے کے باوجود مسلسل ناکامی کے جھنڈے گاڑ رہی ہے جبکہ اتنی تنقید کے باوجود ذرا سی بھی شرم سندھ حکومت کے قریب سے نہیں گذری۔

مزید پڑھیں

سندھ حکومت کراچی کے حالات بدلے، خرم شیر زمان

صدر پی ٹی آئی کراچی خرم شیر زمان نے کہا ہے کہ...

خرم شیرزمان نے یہ بھی کہا کہ سندھ حکومت کے سب سے نالائق وزیر وزیر بلدیات ہیں جبکہ وزیر بلدیات پی پی قیادت کی چمچا گیری کرنا اپنا فرض سمجھتے ہیں۔

صدرپی ٹی آئی کراچی خرم شیرزمان نے مزید کہا کہ سکھر کا بیڑا غرق کرنے والے کو صوبے کو تباہ کرنے کا ٹاسک دیا گیا، این ڈی ایم اے اور پاک فوج شہر کراچی میں شہریوں کی مدد کرے۔

یاد رہے کراچی میں تیز بارش کے بعد مختلف سڑکوں پر پانی جمع ہونے سے شدید ٹریفک جام ہوگیا ہے۔

ناگن چورنگی، گرومندر سے تین ہٹی ، نیپا سے سفاری پارک ، انچولی سے سہراب گوٹھ ، بلوچ کالونی سے عوامی مرکز، محمود آباد سے نرسری ، ڈرگ روڈ سے میلینیم مال  پر شدید ٹریفک جام ہے۔

اس کے علاوہ  جناح بریج ، ریجنٹ پلازہ سے عائشہ باوانی ، تبت سینڑ سے صدر موبائل مارکیٹ تک بھی ٹریفک کی روانی شدید متاثر ہے۔