امریکی گلوکارہ سلینا گومز نے عالمی وبا کے دوران اپنے مداحوں کی اعصابی صحت سے متعلق فکرمندی کا اظہار کیا۔

غیر ملکی خبر رساں ادارے کے مطابق امریکی گلوکارہ نے اپنے ایک انٹرویو کے دوران اپنے مداحوں سے کہا کہ وہ اپنے احساسات کے بارے میں اپنے اہلِخانہ اور دوستوں کو بتائیں۔

اس حوالے سے گلوکارہ سلینا گومز کا کہنا تھا کہ یہ دیکھ کر دکھ ہوتا ہے کہ ان کا کوئی مداح کوویڈ-19 کے دوران اب بھی ایڈجسٹ ہونے کے لیے جدوجہد کر رہا ہے۔

سلینا گومز نے بتایا کہ وہ اپنے اہلِ خانہ کے ساتھ کے بغیر مشکل حالات سے نہیں گزر پاتیں۔

یاد رہے کہ رواں برس اپریل میں سلینا گومز نے بتایا تھا کہ وہ ایک ذہنی بیماری میں مبتلا ہیں۔

تاہم حالیہ انٹرویو کے دوران جب ان سے ’ریئر اپمکٹ فنڈ‘ سے متعلق سوال کیا گیا تو انھوں نے کہا کہ یہ وہ موضوع ہے جو ان کے دل کے بے حد قریب ہے۔

اس فنڈ کے تحت 10 کروڑ امریکی ڈالر جمع کرنا ہیں تا کہ پسماندہ علاقوں میں ذہنی امراض کے علاج کے لیے سروسز فراہم کی جاسکیں۔

سلینا کا کہنا تھا کہ میں ذہنی امراض اور اپنی کہانی سے متعلق سنجیدہ رہی ہوں، لہٰذا میں جانتی تھی کہ یہ (فنڈ) وہ ہے جس سے مجھے منسلک ہونا چاہیے۔

واضح سلینا نے کہا کہ میرا خیال ہے کہ لوگوں سے رابطہ ہی مجھے مضبوط بناتا ہے۔