پی ایس پی سربراہ مصطفیٰ کمال  نے  کہا ہے کہ پیپلزپارٹی سندھیوں مہاجروں سمیت سب سے تعصب کر رہی ہے۔

تفصیلات کے مطابق پی ایس پی سربراہ مصطفیٰ کمال نے حیدرآباد میں خطاب کرتے ہوئے کہا کہ پیپلزپارٹی نے پہلے سندھیوں سے دشمنی کی اور پھر ہمیں تباہ کر رہی ہے۔

مصطفیٰ کمال نے کہا کہ پیپلزپارٹی نے کراچی حیدرآباد کو بھی دیہی علاقہ بنا کر تباہ و برباد کر دیا ہے جبکہ ایم کیو ایم اپنی کرپشن چھپانے کے لیے سندھ دھرتی کو توڑنے کا نعرہ لگاتی ہے ۔

 پی ایس پی کے سربراہ نے یہ بھی کہا کہ اس نعرے سے نفرتیں پیدا ہوتی ہیں جبکہ پیپلزپارٹی کو اس نعرے سے فائدہ ہوتا ہے ۔

مصطفیٰ کمال کا کہنا تھا کہ پیپلزپارٹی اور ایم کیو ایم دونوں جماعتیں نوراکشتی کھیل رہی ہیں، صوبے کے نعرے لگانے والوں کو دو وزارتیں مل جائیں تو دونوں جماعتیں بھائی بھائی ہوجاتی ہیں۔

پی ایس پی سربراہ مصطفیٰ کمال کا مزید کہنا تھا کہ شہری علاقوں سے جنہیں مینڈیٹ ملا انہوں نے میرے شہر کو لوٹا، مہاجر نام پر ووٹ لینے والوں کو کہتا ہوں مہاجروں کو جرگہ بلاؤ اور بتاؤ مہاجروں کو درست راستہ کون سا ہے۔

واضح رہے اس سے  قبل پی ایس پی سربراہ مصطفیٰ کمال نے ضلع کورنگی کے علاقے ناصر کالونی میں کارکنان سے خطاب کرتے ہوئے کہا تھا کہ کراچی شہر دنیا میں سب سے زیادہ ترقی کرنے والا شہر تھا لیکن کراچی کو چوروں نے نہیں چوکیداروں نے لوٹا ہے۔

 پی ایس پی سربراہ نے کہا تھا کہ دنیا میں آج اگر کچرے کی کہیں کی مثال دی جاتی ہے تو وہ کراچی کی دی جاتی ہے جبکہ اگر کرنٹ لگنے سے اموات کی مثال کراچی کی دی جاتی ہے۔