وزیراعلیٰ بلوچستان جام کمال خان نے کہا ہے کہ بلوچستان میں بین المذاہب ہم آہنگی کی صورتحال مثالی ہے۔

تفصیلات کے مطابق وزیراعلیٰ بلوچستان جام کمال خان سے وفاقی پارلیمانی سیکریٹری مذہبی امور وبین المذاہب ہم آہنگی شنیلا روتھ کی ملاقات ہوئی جس میں پارلیمانی سیکریٹری نے مذہبی ہم آہنگی کے فروغ، اقلیتوں کے مفادات کے تحفظ سمیت خطیر بجٹ مختص کرنے پر وزیراعلیٰ کا شکریہ ادا کیا۔

اس موقع پر شنیلا روتھ نے کہا کہ بلوچستان حکومت نے اقلیتی امور کا علیحدہ محکمہ قائم کرکے مضبوط پلیٹ فارم مہیا کیا ہے جبکہ بلوچستان حکومت کا اقلیتوں کی فلاح وبہبود اور ان کی ترقی کے لئے کردار قابل ستائش ہے

وفاقی پارلیمانی سیکریٹری مذہبی امور وبین المذاہب ہم آہنگی شنیلا روتھ نے مزید کہا کہ ماضی میں اقلیتی امور کے حوالے سے بلوچستان کو نظرانداز کیا جاتا رہا ہے، وزیراعظم کی خصوصی ہدایت پر بلوچستان کا دورہ کررہی ہوں جبکہ دورہ کا مقصد صوبے کی اقلیتوں کیلئے وفاقی ترقیاتی منصوبوں کے حوالے سے تجاویز لے سکوں۔

وزیراعلیٰ بلوچستان جام کمال خان نے ملاقات میں کہا کہ اقلیتوں کا بلوچستان کی تعمیر وترقی، تعلیم، صحت اور دیگر شعبوں میں ہمیشہ اہم کردار رہا ہے جبکہ صوبائی حکومت اقلیتوں کے حقوق کے تحفظ اور ان کی فلاح وبہبودکو خصوصی اہمیت دیتی ہے

جام کمال خان نے یہ بھی کہا کہ سرکاری ملازمتوں میں اقلیتوں کے لئے مختص پانچ فیصد کوٹہ پر عملدرآمد یقینی بنایا گیا ہے۔

وزیراعلیٰ بلوچستان جام کمال خان نے شنیلا روتھ سے بات چیت کرتے ہوئے مزید کہا کہ اقلیتوں کے عبادت گاہوں اور فلاح وبہبود کے منصوبوں کیلئے 2 ارب روپے کی خطیر رقم مختص کی گئی ہے۔