پی ایس پی سربراہ مصطفیٰ کمال  نے  کہا ہے کہ پیپلز پارٹی اور ایم کیو ایم سندھ میں لسانی فسادات  کرانا چاہتے ہیں لیکن پی ایس پی سندھ کو تقسیم نہیں ہونے دیگی۔

تفصیلات کے مطابق پی ایس پی سربراہ مصطفیٰ کمال نے ضلع کورنگی کے علاقے ناصر کالونی میں کارکنان سے خطاب کرتے ہوئے کہا کہ کراچی شہر دنیا میں سب سے زیادہ ترقی کرنے والا شہر تھا لیکن کراچی کو چوروں نے نہیں چوکیداروں نے لوٹا ہے۔

 پی ایس پی سربراہ نے کہا کہ دنیا میں آج اگر کچرے کی کہیں کی مثال دی جاتی ہے تو وہ کراچی کی دی جاتی ہے جبکہ اگر کرنٹ لگنے سے اموات کی مثال کراچی کی دی جاتی ہے۔

 اپنے بیان میں مصطفیٰ کمال  نے عمران خان پر تنقید کرتے ہوئے کہا کہ بہت امید تھی کہ وزیراعظم کراچی کے لئے کچھ اعلان کرینگے عمران خان آئے  گورنر ہاوس کا دورا کیا پرچہ پڑھا  اور چلتے بنے۔

پی ایس پی سربراہ نے کہا کہ مسئلہ اختیارات کا نہیں کردار کا ہے، آج بھی سب مسائل حل ہو سکتے ہیں صرف اس شہر کو کردار والے لوگوں کی ضرورت ہے۔

 مصطفیٰ کمال  نے یہ بھی کہا کہ یہ تمام مسائل وہی حل کر سکتا ہے جسے موت کے بعد کا خوف ہو، جسے یہ خوف ہو کہ ایک دن یہ سب ختم ہوجانا ہے اور جواب دے ہونا ہے۔

پی ایس پی سربراہ مصطفیٰ کمال  نے مزید کہا کہ یہ کام پی ایس پی اور مصطفیٰ کنال کے لوگ اکیلے نہیں کر سکتے،کورنگی والوں آپ کو پی ایس پی کا حصہ بن کر اپنا کردار ادا کرنا ہوگا۔