گلگت بلتستان کے حوالے سے پاکستان نے بھارتی بیانات کو غیر ضروری اور غیر مناسب قرار دے کر مسترد کر دیا ۔

تفصیلات کے مطابق ترجمان دفترخارجہ زاہد حفیظ چوہدری نے اپنے ایک بیان میں کہا کہبھارتی وزارتِ خارجہ کے گلگت بلتستان سے متعلق بیانات غیر ذمہ دارانہ ہیں جبکہ بھارت کا اس معاملہ سے کوئی سروکار نہیں۔

اپنے بیان میں ترجمان دفترخارجہ زاہد حفیظ چوہدری نے کہا کہ گلگت بلتستان کے حوالے سے بھارت کا قانونی، اخلاقی یا تاریخی طور پر کوئی تعلق نہیں۔

ترجمان دفترخارجہ نے یہ بھی کہا کہ بھارت کے جھوٹے من گھڑت دعوے نہ تو حقائق بدل سکتے ہیں اور نہ ہی بھارت کی مقبوضہ کشمیر میں انسانی حقوق کی سنگین خلاف ورزیوں سے توجہ ہٹاسکتے ہیں۔

زاہد حفیظ چوہدری کا کہنا تھا کہ بھارت 72سال سے جموں و کشمیر پر غیرقانونی قبضہ کئے ہوئے ہے جبکہ بھارت کے جبر و استداد کے باوجود کشمیری مزاحمتی تحریک جاری ہے بلکہ مضبوط تر ہورہی ہے۔

ترجمان دفترخارجہ زاہد حفیظ چوہدری کا مزید کہنا تھا کہ پاکستان زور دیتا ہے کہ بھارت فوری طور پر جموں و کشمیر کا غیرقانونی قبضہ چھوڑے جبکہ بھارت اپنی بین الاقوامی ذمہ داریاں پورے کرتے ہوئے کشمیریوں کو آزادانہ، شفاف استصواب رائے کے زریعہ حق خودارادیت دے۔