پاکستان کے نامور اداکار عدنان صدیقی نے بیٹیوں کے عالمی دن پر محبت بھرا پیغام جاری کر دیا ہے۔

اداکار عدنان صدیقی نے سماجی رابطے کی ویب سائٹ انسٹاگرام پر ایک تصویر پوسٹ کی ہے۔

عدنان صدیقی کی جانب سے پوسٹ کی جانے والی تصویر کی کیپشن میں اداکار نے بیٹیوں کے لیے محبت بھرا پیغام جاری کیا اور اپنی بیٹیوں کے ساتھ گزارے اپنے لمحات کو لفظوں میں پرویا اور گزرے وقت کو دوبارہ گزارنے کی خواہش کا اظہار کیا۔

See more

دوسری جانب اداکار نے اپنی بیٹیوں کو مخاطب کرتے ہوئے لکھا کہ آپ دونوں بہت تیزی کے ساتھ بڑی ہو رہی ہیں، کاش یا تو وقت رک جائے یا پھر میرے پاس وہ مشین آجائے جس کی مدد سے میں اس دن تک واپس جاؤں جب آپ پیدا ہوئیں تھیں۔

انہوں نے کہا کہ لگتا ہے کہ یہ کل کی بات ہے جب آپ رو رو کر مجھے جگاتے تھے۔

اداکار نے بتایا کہ آپ نے اپنی انگلی مجھے پکڑوائی اس بھروسے کے ساتھ کہ جب آپ اپنا پہلا قدم لیں گی تو میں آپ کو مضبوطی سے تھاموں گا۔

عدنان صدیقی نے کہا کہ آج آپ لوگوں کو دیکھتا ہوں جو اب نوجوان ہورہی ہیں، اپنے والد کا سرفخر سے بلند کر رہی ہو، حتیٰ کہ آپ اپنی رائے برقرار رکھنے کے لیے مجھ سے اختلاف کرتی ہیں۔

دوسری جانب اداکار عدنان صدیقی نے لکھا کہ میں جانتا ہوں کہ اس وقت آپ مجھ سے شدید نفرت کرتی ہوں گی جب میں آپ کی بات سے اختلاف کرتا ہوں لیکن یہ سیکھنے کا وقت ہے۔

انہوں نے مزید کہا کہ آپ دونوں کو آگے اپنے بل بوتے پر چلنا ہے، اپنے صحیح و غلط کا انتخاب کرنا ہے اور اپنے اچھے برے کے فیصلے کرنے ہیں۔

عدنان صدیقی نے اپنی بیٹیوں کو نصیحت کرتے ہوئے کہا کہ آپ جو بھی کام کریں اس کے لیے ذمہ دار بنیں۔

انھوں نے اپنی بیٹیوں کو حوصلہ دیتے ہوئے کہا کہ اگر آپ کہیں گرتی ہیں تو میں آپ کو سنبھالنے کے لیے موجود ہوں، زندگی آسان نہیں ہے۔

اداکار کا کہنا تھا کہ یہ آپ کا اپنا سفر ہوگا، میں آپ کے پروں کے نیچے ہوا کی مانند رہوں گا، لیکن پرواز آپ کی ہوگی، میں آپ کو اندھیروں سے دیکھوں گا، آپ زندگی کی خوشی منائیں گیں۔

واضح رہے کہ اداکار عدنان صدیقی نے پوسٹ کے اختتام میں اپنی بیٹیوں کو پیار دیا اور انھیں بیٹیوں کے عالمی دن پر مبارکباد بھی دی۔