جے یوآئی کے سربراہ مولانا فضل الرحمان نے کہا ہے کہ جب تک سلیکٹڈ لوگ حکمران ہیں اس وقت تک کسی کی عزت محفوظ نہیں۔

تفصیلات کے مطابق جے یو آئی کے سربراہ مولانا فضل الرحمان نے ق لیگ کے سربراہ چوہدری شجاعت کی رہائش گاہ پر ان کی عیادت کے موقع پرمیڈیا سے گفتگو کرتے ہوئے کہا کہ ملک میں بیروزگاری، مہنگائی عروج پر ہے، روپے کی قدر بھی گرتی جارہی ہے جبکہ اب اس ملک میں عام خاتون کی عزت بھی محفوظ نہیں۔

مولانا فضل الرحمان نے کہا کہ اس قسم کے واقعات کے بعد بھی ریاست مدینہ کا نام آتا ہے، ہمارے اداروں کا فرض ہے اس واقعے کو سنجیدگی سے لیں اور ذمہ داران کو کیفر کردار تک پہنچایا جائے۔

جے یو آئی کے سربراہ نے یہ بھی کہا کہ سر بازار ناموس رسالت، صحابہ کی شان پر حملے کیے جارہے ہیں اور ذمہ دار ایسی باتیں کررہے ہیں جو زخموں پر نمک چھڑک رہے ہیں۔

مولانا فضل الرحمان کا کہنا تھا کہ اس وقت فرقہ واریت کی آگ بھڑک رہی ہے، یہ مذہبی مسئلہ نہیں ہمارے قانون میں یہ بات موجود ہے لیکن ریاست کی خاموشی اپنے خفیہ کردار کی نشاندہی کررہی ہے۔

جے یو آئی کے سربراہ کا یہ بھی کہنا تھا کہ اگر حکمران کسی کو سرعام پھانسی دینا چاہیں تو ان کے پاس ایگزیکٹو اختیارات ہیں ماضی میں ایسا ہوچکا ہے جبکہ اصل مقصد ایسے مجرمان کو گرفت میں لانا ہے۔

مولانا فضل الرحمان نے کہا کہ جمعیت علمائے اسلام ف کے رہنما نے کہا کہ اپوزیشن کی کل جماعتی کانفرنس کی میزبان پیپلز پارٹی ہے، ٹھوس قسم کے فیصلے نہ ہونے تک روایتی قراردادوں کی کوئی اہمیت نہیں۔

جے یو آئی کے سربراہ مولانا فضل الرحمان نے مزید کہا کہ کل جماعتی کانفرنس کی تاریخ طے ہو چکی، 20 ستمبر کو اے پی سی میں تمام معاملات پر گفتگو ہوگی، جب تک ٹھوس فیصلے نہیں ہوں گے روایتی فیصلوں سے فائدہ نہیں ہوگا۔