سندھ حکومت نے اسکولوں میں کورونا سے حفاظتی اقدامات سے متعلق بڑا فیصلہ کر لیا ہے۔

تفصیلات کے مطابق سندھ میں اسکولز انتظامیہ کورونا سے متعلق حفاظتی اقدامات کی پالیسی پر عمل کر رہے ہیں یا نہیں اس حوالے سے اسکولوں کی مانیٹرنگ کے لیے سندھ حکومت نے صوبے بھر میں ضعلی مانیٹرنگ کمیٹیز قائم کردیں۔

چیف سیکریٹری سندھ نے اسکولوں میں کورونا سے متعلق حفاظتی اقدامات کی مانیٹرنگ کے لیے کمیٹی تشکیل دینے کا نوٹیفکیشن جاری کردیا۔

نوٹیفکیشن کے مطابق مانیٹرنگ کمیٹیز 9 ارکان پر مشتمل ہوگی جبکہ ضلعی مانیٹرنگ کمیٹیز کا چیرمین سربراہ ڈپٹی کمشنر ہوگا۔

نوٹیفکیشن میں کہا گیا ہے کہ کمیٹی میں ضعلی ایجوکیشن افسران، چیف مانیٹرنگ افسر، ضعلی ڈاریکٹوریٹ پرائیوٹ اسکولز کے نمائندے شامل ہونگے جبکہ کمیٹی میں ریفارم سپورٹ یونٹ، پی ڈی ایم اے، ایجوکیشن ورکس ایکسین اور ضلعی سطح پر کام کرنے والی این جی اوز کے عہدیداران  بھی شامل ہونگے۔

نوٹیفکیشن میں مزید کہا گیا ہے کہ کمیٹی اسکولوں میں کورونا سے متعلق سندھ حکومت کی ایس او پیز پر عمل درآمد سے متعلق مانیٹرنگ کرے گی جبکہ کورونا سے بچائو کے لیے کمیٹی متعلقہ اسکولوں کو اپنی سفارشات اور عمل درآمد کرانے کی بھی پابند ہوگی۔