وزیر اطلاعات سینیٹر شبلی فراز نے کہا ہے کہ بچے ہمار ا مستقبل ہیں، ان کے تحفظ کیلئے تمام ضروری اقدامات اٹھائے جارہے ہیں۔

تفصیلات کے مطابق وزیر اطلاعات سینیٹر شبلی فراز سے پنجاب اسمبلی کی خواتین اراکین کے وفد کی ملاقات ہوئی جس میں وفد نے بچوں کے تحفظ کے لیے ادارہ جاتی تعاون،قانون سازی کو مزید بہتر کرنے اور بچوں کے حقوق کے تحفظ کیلئے سخت سے سخت سے قانون سازی پر زور دیا۔

اراکین صوبائی اسمبلی نے وزیراطلاعات کو آ گاہ کیا کہ بچوں کے تحفظ کے لیے قانون سازی اور آگاہی ان کے دورے کا مرکزی مقصد ہے جبکہ چیئرپرسن چائلڈ پروٹیکشن اینڈ ویلفیئر بیورو سارہ احمد نے بچوں کے تحفظ کیلئے کئیے جانے والے اقدامات سے متعلق بھی آگاہ کیا۔

ملاقات میں وزیر اطلاعات سینیٹر شبلی فراز نے کہا کہ بچوں کے ساتھ ہونے والی زیادتیوں اور مظالم کے نتائج انتہائی بھیانک ہوتے ہیں۔

وزیر اطلاعات نے کہا کہ بچوں کے حقوق کے تحفظ کیلئے پارلیمنٹ نے موثر قانون سازی کی ہے اور صوبائی سطح پر بھی بچوں کو تحفظ دینے کی خاطر مختلف اقدامات اٹھائے گئے ہیں۔

شبلی فراز نے یہ بھی کہا کہ اس کے ساتھ ساتھ اس امر کی ضرورت ہے کہ موجود قوانین پر عملدرآمد کو یقینی بنایا جائے جبکہ موجودہ قوانین کا مل کر جائزہ لیا جائے تاکہ جہاں پر سقم نظر آئے اسے دور کیا جا سکے۔

وزیر اطلاعات سینیٹر شبلی فراز نے مزید کہا کہ بدلتے وقت اور حالات کے ساتھ ضروری ہے کہ قانون سازی کو بھی مزید بہتر کیا جائے جبکہ بحث مباحثوں اور ملاقاتوں کا یہ سلسلہ جاری رہنا چاہیے تاکہ ہمیں مسائل سے آگاہی ہو اور وفاقی وصوبائی سطح پر لاگو قوانین پر ایک دوسرے کے نقطہ نظر سے استفادہ کیا جا سکے۔

اس موقع پر وزیر اطلاعات کے ہمراہ سینیٹ میں چیف وہپ سینیٹر سجاد حسین طوری بھی موجود تھے۔