امیر جماعت اسلامی سینیٹر سراج الحق نے کہا ہے کہ کورونا اور سیلاب میں عوام کی پریشانیوں سے حکمرانوں کی نااہلی کھل کر سامنے آگئی ہے۔

تفصیلات کے مطابق امیر جماعت اسلامی سینیٹر سراج الحق نے اپنے ایک بیان میں کہا کہ محکمہ موسمیات کی پیشگی وارننگ کے باوجود ایمرجنسی بنیادوں پر حالات سے نپٹنے کی صلاحیت میں بہتری نہیں آئی۔

اپنے بیان میں سراج الحق نے کہا کہ مون سون بارشوں کی وجہ سے کراچی سمیت ملک بھر میں انفراسٹرکچر کا پول کھل گیا ہے، حالیہ بارشوں میں 163 لوگ موت کے منہ میں چلے گئے۔

امیر جماعت اسلامی نے یہ بھی کہا کہ کراچی کئی روز سے گندے پانی میں ڈوبا ہواہے جبکہ اربن فلڈنگ سے نپٹنے کے بروقت انتظامات ہو جاتے تو ان لوگوں کو بچایا جاسکتا تھا۔

سراج الحق  کس کہنا تھا کہ آج کراچی خود کولاوارث سمجھ رہاہے ،بازار، گلیاں اور سڑکیں دلدل سے بھری ہوئی ہیں جبکہ این ڈی ایم اے ادارے کو 15 سال ہو گئے ہیں مگر اب تک اس کی کارکردگی سے کوئی بھی مطمئن نہیں۔

امیر جماعت اسلامی سینیٹر سراج الحق کا مزید کہنا تھا کہ حکومت بارشوں سے ہونے والے نقصان کا تخمینہ لگائے جبکہ جن لوگوں کے مکانات گرے ہیں ان کو معاوضہ دیا جائے۔