کراچی میں کورونا وائرس کے بڑھتے ہوئے کیسز کے پیش نظر حکومت نےآج سے اسمارٹ لاک ڈاؤن نافذ کردیا گیا ہے جو15 اکتوبر تک جاری رہے گا۔

تفصیلات کے مطابق کراچی میں کورونا کیسز میں تشویشناک اضافے کے باعث  شہر میں مائکرو اسمارٹ لاک ڈاون 2 تاریخ سے 15 اکتوبر تک رہیگا۔

ذرائع کا کہنا ہے کہ ملیر کے 44 علاقوں میں لاک ڈاون لگایا جائیگا کیونکہ متاثرہ علاقوں سے 330 کورونا کے کیسز رپورٹ ہوچکے ہیں۔

ذرائع کا مزید کہنا ہے کہ ملیر کینٹ فیز 2، عسکری 5 کی اسٹریٹ 4، سعید اباد، محلہ شادمان ٹاون، جعفر طیار، عمار یاسر سوسائٹی، ملیر ٹاون شپ، گلشن حدید فیز 1، عبداللہ گوٹھ، شاہ لطیف ٹاون، لیبر اسکوائر، شیرپاو کالونی، ابراہمی حیدری، گلشن حدید فیز 2 کی متاثرہ گلیوں کو سیل کیا جائیگا۔

واضح رہے اس سے قبل کورونا وائرس کے بڑھتے ہوئے کیسز کے باعث ضلع وسطی کے 48 مقامات پر دو ہفتوں  کے لیے مائیکرو اسمارٹ لاک ڈاؤن نافذ کرنے کا فیصلہ کیا گیا تھا۔

لاک ڈاؤن نافذ کرنے والے علاقوں میں نارتھ کراچی کے 4 مقامات،نارتھ ناظم آباد کے 21 مقامات ،لیاقت آباد کے 9 اور گلبرگ کے 12 مقامات پر مائیکرو اسمارٹ لاک ڈاؤن پر عملدرآمد شروع ہوگیا تھا۔