کیپٹن (ر) صفدر نے مسلم لیگ ن کی رہنما مریم نواز کی مزار قائد پر حاضری کے موقع پر مزار کا تقدس پامال کردیا اور ’ووٹ کو عزت دو‘ کے نعرے لگوا دیے۔

تفصیلات کے مطابق پاکستان مسلم لیگ ن کی نائب صدر مریم نواز نے پاکستان ڈیموکریٹک موومنٹ (پی ڈی ایم) کے جلسے میں شرکت کے لیے کراچی پہنچنے کے بعد پہلے مزار قائد پر حاضری دی تو ان کے شوہر کیپٹن (ر) صفدر نے مزار کے تقدس کو پامال کرتے ہوئے سیاسی نعرے لگوا دیئے۔

مریم نواز کے ہمراہ ان کے شوہر کیپٹن (ر) صفدر، دیگر پارٹی رہنماؤں نے بھی مزار قائد پر فاتحہ خوانی کی۔

اس موقع پر کیپٹن (ریٹائرڈ) صفدر نے ’ووٹ کو عزت دو‘ کے نعرے لگوا دیے۔

دوسری جانب مسلم لیگ ن کے کارکنان کے درمیان مزار قائد کے مرکزی گیٹ پر جھگڑا ہوا، ایک کارکن موبائل فون سے فوٹیج بنا رہا تھا، دوسرے کارکن کا دھکا لگنے سے موبائل فون گر گیا جس پر جھگڑا شروع ہوگیا بعدازاں ن لیگ کے کارکنان نے دونوں افراد کے درمیان صلح کروائی۔