پاکستان نے بھارتی مقبوضہ کشمیر میں بھارتی ریاستی دہشت گردی کی بھرپور مذمت کردی۔

تفصیلات کے مطابق ترجمان دفترخارجہ زاہد حفیظ چوہدری نے اپنے ایک بیان میں کہا کہ قابض بھارتی افواج کے ہاتھوں جعلی مقابلوں میں نہتے کشمیریوں کی ماورایے عدالت قتل عام اور خودساختہ گھیراو اور تلاشی آپریشنز کی شدید مذمت کرتے ہیں۔

ترجمان دفترخارجہ نے کہا کہ گذشتہ ایک برس میں خواتین اور بچوں سمیت 300 سے زاید کشمیری بھارتی قابض افواج کے ہاتھوں شہید ہوئے جبکہ گذشتہ روز مقبوضہ کشمیر کے کلگام اور پلوامہ اضلاع میں بھارتی قابض افواج کے غیر قانونی و غیر انسانی کریک ڈاؤن میں ایک 14 سالہ بچہ شدید زخمی ہوا جبکہ مزید 4 نوجوان کشمیریوں کو شہید کیا گیا۔

زاہد حفیظ چوہدری نے واضح کیا کہ بھارت کو سمجھ لینا چاہیےکہ کشمیری عوام کے خلاف طاقت کا بہیمانہ استعمال بشمول ماورائے عدالت قتل عام، حراستی تشدد و ہلاکتیں، جبری گمشدگیاں، کشمیری قیادت و نوجوانوں کی قید وبند، پیلٹ گنز کا استعمال، اجتماعی سزاء کے طور پر گھروں کی تباہی و دیگر تشدد کے طریقے نہ ماضی میں کامیاب ہویے نہ آئندہ ہوں گے۔

ترجمان دفترخارجہ کا کہنا تھا کہ بھارتی ریاستی دہشت گردی کے باعث کشمیریوں کے ناقابل تنسیخ حق خود ارادیت کے لیے ان کی اپنی تحریک مزاحمت مزید مظبوط ہو رہی ہے۔

زاہد حفیظ چوہدری کا یہ بھی کہنا تھا کہ پاکستان عالمی برادری،اقوام متحدہ، انسانی حقوق تنظیموں اور بین الاقوامی میڈیا پر زور دیتا ہے کہ وہ مقبوضہ کشمیر میں ابتر ہوتی صورتحال کا ادراک کرے۔

ترجمان دفترخارجہ زاہد حفیظ چوہدری کا مزید کہنا تھا کہ پاکستان عالمی برادری پر دباو دیتا ہے کہ وہ مسئلہ کشمیر کے اقوام متحدہ سلامتی کونسل کی متعلقہ قرردادوں کے تحت کشمیریوں کی خواہشات کے مطابق حل تلاش کرے تاکہ خطے میں دیرپا امن و استحکام یقینی بنایا جا سکے۔