مقبوضہ کشمیر میں بھارتی فوج نے ضلع شوپیاں میں مزید 2 کشمیری نوجوانوں کو شہید کردیا۔

کشمیر میڈیا سروس کے مطابق مقبوضہ کشمیر میں قابض بھارتی فوج کی ریاستی دہشت گردی جاری ہے، بھارتی فوج نے مقبوضہ وادی کے ضلع شوپیاں میں تازہ ترین ریاستی دہشت گردی کی کارروائی میں 2 کشمیری نوجوانوں کو شہید کر دیا۔

کے ایم ایس کی رپورٹ میں مزید کہا گیا ہے کہ بھارتی فوج نے شوپیاں کے متعدد علاقوں کا محاصرہ کررکھا ہے اور محاصرے کی آڑ میں ہی کشمیری نوجوانوں کو شہید کیا

واضح رہے کہ چند روز قبل بھی بھارتی فورسز کی جانب سے شوپیاں میں شہید کیے گئے تین کشمیری نوجوانوں کی میتیں ان کے ورثاء کے حوالے کی گئیں۔

قابض بھارتی فورسز کے ہاتھوں شہید ہونے والے نہتے کشمیری مزدوروں پر پاکستانی دہشت گرد ہونے کا الزام عائد کیا گیا تھا تاہم بھارتی تحقیقات میں تینوں بے گناہ ثابت ہوئے۔