امیر جماعت اسلامی پاکستان سینیٹر سراج الحق نے فرانسیسی سفیر کو ملک سے نکالنے کا مطالبہ کر دیا۔

تفصیلات کے مطابق سینیٹ اجلاس میں امیر جماعت اسلامی پاکستان سینیٹر سراج الحق نے اظہار خیال کرتے ہوئے کہا کہ پونے دو ارب مسلمانوں کے جذبات مجروح کئے گئے۔

امیر جماعت اسلامی پاکستان نے کہا کہ نبی پاک کی شان میں گستاخی کا سلسلہ جاری ہے،پاکستان کو اس معاملے پر امت مسلمہ کی ترجمانی کرنی چاہئے۔

 سراج الحق نے یہ بھی کہا کہ کویت نے فرانس کی تمام مصنوعات کا بائیکاٹ کی، پاکستان میں بھی تمام فرانسیسی مصنوعات کا بائیکاٹ کیا جائے۔

امیر جماعت اسلامی پاکستان سینیٹر سراج الحق نے مزید کہا کہ وزیراعظم عمران خان کا بیان ناکامی ہے جبکہ او آئی سی کا اجلاس بلانے کیلئے اقدامات اٹھائے جائے اور جب تک فرانس معافی نہیں مانگتا، تب تک اسکے سفیر کو ملک سے نکالا جائے۔

دوسری جانب پاکستان کے ایوان بالا (سینیٹ) میں یورپی ملک فرانس میں گستاخانہ خاکوں کیخلاف مذمتی قرارداد کو متفقہ طور پر منظور کر لیا گیا ہے۔

یہ تاریخی قرارداد قائد ایوان ڈاکٹر شہزاد وسیم نے پیش کی۔

قرارداد کے متن میں کہا گیا ہے کہ ایسے اقدامات جب حکومت سرپرستی میں ہوں تو مخلتف مذاہب میں تقسیم پیدا ہوتی ہے۔

قرارداد کے متن میں مزید کہا گیا ہے کہ حضرت محمد ﷺ کے لیے ہماری محبت ہمارے ایمان کا حصہ ہے اور کوئی مسلمان حضرت محمد ﷺ کی شان میں گستاخی برداشت نہیں کر سکتا۔