صدر مملکت ڈاکٹر عارف علوی نے کہا ہے کہ معاشرے کے پسماندہ طبقات کی دیکھ بھال کرنا حکومت کی ذمہ داری ہے۔

صدر مملکت ڈاکٹر عارف علوی کو پنجاب کے خصوصی تعلیم اور سماجی بہبود کے محکموں کی معذوری سے متعلق بریفنگ دی گئی۔

بریفنگ کے دوران کہا گیا کہ حکومت پنجاب نے پچھلے دو سالوں میں 62 نئی بسیں مہیا کیں ، اور 14 خصوصی تعلیمی اداروں کو اپ گریڈ کیا۔

ڈاکٹر عارف علوی نے خصوصی بچوں کے لئے موثر اقدامات پر پنجاب کے محکمہ خصوصی تعلیم اور محکمہ سوشل ویلفیئر کو سراہا۔

 ڈاکٹر عارف علوی نے کہا کہ خصوصی بچوں کو مرکزی دھارے میں لانے کیلئے انہیں عام سکولوں میں تعلیم دینے کی ضرورت ہے جبکہ خصوصی افراد کو معاشرے کا فعال رکن بنانے کیلئے ایک جامع نظام تعلیم کی ضرورت ہے۔

صدر مملکت کا کہنا تھا کہ سرکاری اور نجی شعبے میں خصوصی افراد کی ملازمتوں کے کوٹہ پر عمل درآمد ہونا چاہئے، متعلقہ حکام خصوصی افراد کے کوٹہ پر عملدرآمد کرائیں اور سختی سے نگرانی کریں۔

 ڈاکٹر عارف علوی کا یہ بھی کہنا تھا کہ خصوصی افراد کو ضروریات کے مطابق سہولیات  کی فراہمی کیلئے جامع حکمت عملی کی ضرورت ہے جبکہ نجی شعبہ حکومت کے ساتھ شراکت سے خصوصی بچوں کو سٹیٹ آف دی آرٹ مواقع تک رسائی دے سکتا ہے۔

صدر مملکت ڈاکٹر عارف علوی کا مزید کہنا تھا کہ عام اسکولوں میں تعلیم حاصل کرنے کے بعد خصوصی بچے معاشرے کی بہتر خدمت کرسکتے ہیں جبکہ مارکیٹ کی ضروریات کے مطابق تعلیم سے خصوصی افراد کو نوکریاں حاصل کرنے میں مدد ملے گی۔

گورنر پنجاب ، چوہدری محمد سرور، وزیرِ اعلیٰ پنجاب سردار عثمان بزدار، وزیر قانون و سماجی بہبود ،راجہ بشارت ، وزیر خزانہ پنجاب ، ہاشم جوان بخت نے شرکت کی۔