مسلم لیگ(ن)پنجاب کی ترجمان عظمی بخاری نے کہا ہے کہ حکومت نے جلسے کو ناکام بنانے کےلیے ہتھکنڈے استعمال کیے۔

تفصیلات کے مطابق مسلم لیگ(ن)پنجاب کی ترجمان عظمی بخاری نے اپنے ایک بیان میں کہا کہ پنجاب حکومت مریم نواز کے گوجرنوالہ پہنچنے میں رکاوٹیں کھڑی کررہی ہے۔

عظمی بخاری نے کہا کہ پنجاب حکومت مریم نواز کے قافلے کو راستے میں جگہ جگہ روکنے کی کوشش کررہی ہے، مریم نواز جلد ازجلد جلسہ گاہ میں پہنچنا چاہتی ہیں۔

مسلم لیگ(ن)پنجاب کی ترجمان نے یہ بھی کہا کہ گوجرنوالہ میں مکمل لاک ڈاؤن ہے پھر بھی ہزاروں لوگ جلسہ گاہ میں پہنچ گئے ہیں۔

عظمی بخاری کا کہنا تھا کہ حکومت نے جلسے کو ناکام بنانے کےلیے ہتھکنڈے استعمال کیے لیکن کارکنوں کے حوصلے اور ہمت کی داد دیتے ہیں۔

مسلم لیگ(ن)پنجاب کی ترجمان عظمی بخاری کا مزید کہنا تھا کہ پی ڈی ایم آج تاریخ رقم کرنے جارہی ہے اور مریم نواز جلد جلسہ گاہ میں ہونگی۔