پی ٹی آئی رہنماء خرم شير زمان نے کہا ہے کہ ملک کے امن دشمن قوتوں کو ہمیشہ کی طرح ناکامی ہوگی۔

تفصیلات کے مطابق پی ٹی آئی رہنماء خرم شير زمان نے اپنے ایک بیان میں کہا کہ پشاور سانحے کی وجہ سے پوری قوم افسردہ ہے جبکہ معصوم طلباء پر دہشتگردی کا واقعہ قابل مذمت ہے۔

پی ٹی آئی رہنماء نے کہا کہ سانحے میں شہید افراد کے لواحقین سے دلی تعزیت کا اظہار کرتا ہوں جبکہ زخمیوں کی جلد صحتیابی کے لیے دعاگو ہیں۔

خرم شير زمان نے یہ بھی کہا کہ دہشتگردی کی حالیہ کاروائیوں میں دشمن ممالک ملوث ہیں اور بزدلانہ کاروائیاں قوم کے حوصلے کو متزلزل نہیں کرسکتے۔

پی ٹی آئی رہنماء خرم شير زمان نے مزید کہا کہ امن امان کی بحالی کے لیے ہماری فورسز اور شہریوں نے بے شمار قربانیاں دی ہیں، ملک کے امن دشمن قوتوں کو ہمیشہ کی طرح ناکامی ہوگی۔

  واضح رہے پشاور کے علاقے دیر کالونی زرگر آباد میں مدرسے سے ملحقہ مسجد میں دھماکے میں 7 افراد شہید اور 72 زخمی ہوگئے۔

زخمیوں کو ہسپتال منتقل کر دیا گیا ہے تاہم زخمیوں میں سے متعدد کی حالت تشویشناک ہے۔

ذرائع کے مطابق ہسپتالوں میں ایمرجنسی ڈکلیئر اور ڈاکٹروں کی چھٹیاں بھی منسوخ کر دی گئی ہیں۔