شمالی امریکا کے ممالک امریکا اور کینیڈا کو پاکستانی برآمدات میں رواں مالی سال کے دوران کمی جبکہ ان ممالک سے درآمدات میں اضافہ ریکارڈ کیا گیا ہے۔

اسٹیٹ بینک آف پاکستان کی طرف سے جاری کردہ اعدادوشمارکے مطابق جولائی سے لیکراگست2020 تک کی مدت میں امریکا اورکینیڈا کو 716.636 ملین ڈالر کی برآمدات ریکارڈکی گئیں جو گزشتہ مالی سال کی اسی مدت کے مقابلے میں 6.18 فیصد کم ہے۔

گزشتہ مالی سال کے پہلے دومہینوں میں شمالی امریکا کو پاکستانی برآمدات کا حجم 760.96 ملین ڈالرریکارڈ کیا گیا تھا جبکہ مالی سال 2019-20 میں دونوں ممالک کو پاکستان کی برآمدات کا حجم 4.169 ارب ڈالررہا تھا۔

اسٹیٹ بینک کے مطابق مالی سال کے پہلے دومہینوں میں ان ممالک سے درآمدات میں اضافہ ریکارڈکیا گیا ہے جبکہ جولائی سے لیکراگست2020 تک کی مدت میں امریکا اورکینیڈا سے درآمدات کاحجم 371.93 ملین ڈالررہا۔

گزشتہ مالی سال کے پہلے دومہینوں میں ان ممالک سے درآمدات کا حجم 289.88 ملین ڈالرریکارڈ کیا گیا تھا جبکہ مالی سال 2019-20 میں دونوں ممالک سے 2.591 ارب ڈالرکی درآمدات ریکارڈکی گئی تھیں۔