پاک سرزمین پارٹی کا آج کراچی کے باغ جناح میں پاور شو شروع ہوچکا ہے۔

تفصیلات کے مطابق کراچی کے باغ جناح میں پاک سر زمین پارٹی کے زیر اہتمام عوامی جلسہ کا اہتمام کیا گیا ہے چیرمین پی ایس پی مصطفی کمال  بھی  جلسے کے لئے جلسہ گاہ پہنچ گئے۔

چیرمین پی ایس پی مصطفی کمال کے جلسہ گاہ پہنچنے پر پی ایس پی کی پوری قیادت نےاسٹیج پر کھڑے ہوکر مصطفی کمال کا شاندار استقبال کیا۔

لیاقت آباد، اورنگی، لانڈھی، کورنگی، گلشن اقبال، گلستانِ جوہر، عزیز آباد، ناظم آباد، اولڈ سٹی سے قافلے جلسہ گاہ پہنچ گئے۔

کورونا وائرس کی ایس او پیز کو مد نظر رکھتے ہوئے ماسک بھی تقسیم کیے جا رہے ہیں جبکہ خواتین اور بچوں کی بڑی تعداد بھی جلسہ گاہ میں موجود ہیں۔

جلسے کےلئے120 فٹ چوڑا اور 40 فٹ اونچا اسٹیج تیار کیا گیا ہے،جس کے آغاز کا وقت شام 4بجے رکھا گیا ہے۔

ذرائع کے مطابق جلسہ گاہ میں پارٹی پرچم، پینافلیکس پر مصطفی کمال کی تصاویر اور بینرز لگائے گئے ہیں جن پر کراچی کے وسائل اور اسے درپیش مسائل سے متعلق مختلف تحریریں درج ہیں۔

جلسہ گاہ پہنچنے والوں کیلئے تین مختلف مقامات پر پارکنگ کا انتظام کیا گیا ہے، عوام کی آسانی کیلئے باغ جناح میں تین بڑی اسکرین بھی لگائی گئی ہیں۔