وفاقی وزیر برائے ہوا بازی غلام سرور نے کہا ہے کہ ہماری سیاست کا مقصد اپنی آنے والی نسلوں کے لئے خوشحال پاکستان بنانا ہے۔

تفصیلات کے مطابق وفاقی وزیر برائے ہوا بازی غلام سرور خان نے ٹیکسلا میں افتتاحی تقریب سے خطاب کرتے ہوئے کہا کہ ہمیں اقتدار کا کوئی شوق نہیں، آپ کی محرومیاں ختم کر کے خوشحال کریں گے

غلام سرور خان نے کہا کہ گزشتہ انتخابات میں دو بڑی جماعتوں کو شکست ہوئی یہ بہت بڑی بات ہے جبکہ جن کا دامن داغدارہو وہ کیا سیاست کریں گے۔

وفاقی وزیر برائے ہوا بازی کا کہنا تھا کہ پاکستان کو ان جیسے لٹیروں سے آزاد کروائیں گے، ان کے دامن صاف نہیں اب یہ عوام کو بھاشن دے رہے ہیں۔

غلام سرور خان کا یہ بھی کہنا تھا کہ آج کی مسلم لیگ ملک لوٹنے والی جماعت ہے جبکہ اس ملک کے ساتھ غداری کرنے والے ذلیل وخوار ہونگے۔

وفاقی وزیر برائے ہوا بازی غلام سرور خان کا مزید کہنا تھا کہ آج ہمیں پاکستانیت کی ضرورت ہے اور آپس میں اتفاق اتحاد کی ضرورت ہے، مسلمانوں کو تقسیم کرنے کا ایجنڈا کامیاب نہیں ہونے دیں گے۔