وزیر اطلاعات سندھ سید ناصر شاہ نے کہا ہے کہ پیپلز پارٹی گلگت بلتستان کی عوام کو جعلی حکومت بنانے کے عذاب سے چھٹکارہ دلائے گی۔

تفصیلات کے مطابق وزیر اطلاعات سندھ سید ناصر شاہ نے گلگت بلتستان الیکشن کے حوالے سے بیان مین کہا کہ انسٹیٹوٹ آف پبلک اوپنئن کے سروے کے مطابق پی پی پی نے 25 فیصد ووٹ لئے ہیں جبکہ پی ٹی آئی نے پیپلز پارٹی سے کم یعنی 24 فیصد ووٹ لئے ہیں۔

وزیر اطلاعات سندھ نے کہا کہ تمام تر دھاندلیوں اور ریاستی قوت استعمال کرنے کے بعد بھی پی ٹی آئی 24 فیصد ووٹ لے سکی جبکہ پی ٹی آئی نے دھاندلی کرکے  زیادہ سیٹیں جیت لیں۔

سید ناصر شاہ نے یہ بھی کہا کہ یہ دھاندلی کی جیت پی ٹی آئی کا گزشتہ  عام انتخابات سے اب تک  کی کاروائیوں کا تسلسل ہے، اگر دھاندلی نہ ہوتی تو پیپلز پارٹی گلگت بلتستان میں حکومت بناتی۔

وزیر اطلاعات سندھ کا کہنا تھا کہ وزیراعظم عمران خان گلگت بلتستان میں دھاندلی سے جیتنے کے بعد الیکشن ریفارمز کا لولی پاپ دے رہے ہیں لیکن اب سلیکٹڈ گورنمنٹ کا گھر جانے کا وقت آگیا ہے۔

اپنے بیان میں وزیر اطلاعات سندھ سید ناصر شاہ کا مزید کہنا تھا کہ سلیکٹڈ گورنمنٹ اب دوبارہ دنیا کی نظروں میں ایکسپوز ہوگئی ہے، پیپلز پارٹی اپنے اتحادی جماعتوں سے مل کر اس ملک میں حقیقی جمہوریت لائے گی۔