صوبائی وزیر صحت ڈاکٹر یاسمین راشد نے کہا ہے کہ وزیراعظم کی قیادت میں پاکستان کو پولیوفری بنانے کیلئے پرعزم اور کوشاں ہیں۔

تفصیلات کے مطابق صوبائی وزیر صحت ڈاکٹر یاسمین راشد نے محکمہ پرائمری اینڈ سیکنڈری ہیلتھ کئیرمیں وڈیولنک کانفرنس کے ذریعے انڈیپینڈنٹ مانیٹرنگ بورڈ فارگلوبل پولیواریڈیکیشن کے اجلاس میں خصوصی شرکت کی۔

صوبائی وزیر صحت ڈاکٹر یاسمین راشد نے اظہارخیال کرتے ہوئے کہا کہ انتہائی اہم موضوع پر سب کو اکھٹا کرنے پرانتظامیہ کی کاوش کوسراہتی ہوں۔

ڈاکٹر یاسمین راشد نے کہا کہ پنجاب میں انسداد پولیو کی بہت بڑی مہم کا آغاز کیا ہے، صوبہ بھرکے تمام اضلاع میں بچوں کوپولیوسے بچاؤ کیلئے قطرے پلانے کا ہدف ہے۔

صوبائی وزیر صحت نے یہ بھی کہا کہ پنجاب کے تمام سرکاری ہسپتالوں کو حفاظتی ٹیکوں کے بغیر والدین کوبرتھ سرٹیفیکیٹ جاری نہ کرنے کی ہدایت کی گئی ہے جبکہ عالمی ادارہ صحت کی ہدایات کے مطابق انسداد پولیو مہم کے دوران تمام ایس اوپیز پرعملدرآمد کروایا جارہا ہے۔

ڈاکٹر یاسمین راشد کا کہنا تھا کہ کوروناوائرس کی دوسری لہرسے نمٹنے کے ساتھ ساتھ پولیو کے خاتمہ کیلئے بھی پرعزم ہیں جبکہ انسداد پولیو مہم کے دوران تمام ویکسینیٹرز کو حفاظتی سامان فراہم کیا گیا ہے۔

صوبائی وزیر صحت نے کہا کہ ویکسینیٹرزکی50فیصدخالی اسامیوں پربھرتی کاعمل مکمل ہوچکا ہے جبکہ لاہوراور ڈی جی خان میں 100فیصدامیونائزیشن کوریج کیلئے تازہ اعدادوشماراور جدیدٹیکنالوجی کا استعمال کیاجائے گا۔

ڈاکٹر یاسمین راشد نے یہ بھی کہا کہ وزیراعظم عمران خان اور وزیراعلی پنجاب سردارعثمان بزدارکے ویژن کے مطابق پنجاب میں ہرپیدا ہونے والے بچے کو بیماریوں سے محفوظ دیکھناچاہتے ہیں۔

صوبائی وزیر صحت ڈاکٹر یاسمین راشد نے مزید کہا کہ تمام اضلاع میں انسداد پولیو مہم کی مانیٹرنگ کو تیزکردیا گیا ہے، پاکستان میں اسی جذبہ کے ساتھ پولیو کے خلاف جنگ لڑتے رہے توانشاء اللہ جلدپولیوفری پاکستان دیکھیں گے۔

اس موقع پر سیکرٹری صحت پنجاب کیپٹن(ر)محمد عثمان یونس،سیکرٹری صحت جنوبی پنجاب محمداجمل بھٹی،ای او سی کوارڈی نیٹرپنجاب سندس ارشاد،انچارج ای پی آئی پروگرام محمد بشیر شریک ہوئے۔

وڈیولنک کے ذریعے وزیراعظم کے معاون خصوصی برائے صحت ڈاکٹرفیصل سلطان،وزیر صحت خیبرپختونخواہ تیمور سلیم جھگڑا،وزیر صحت سندھ عذرافضل پیپوہو،وزیر صحت بلوچستان رحمت صالح بلوچ،چیف آئی ایم بی لائیم ڈونلڈسن،تمام صوبوں کے سیکرٹریز صحت،قومی وصوبائی ای اوسی کوارڈینیٹرز وای پی آئی ڈائریکٹرز نے شرکت کی۔