اقتصادی امور کے وزیر مخدوم خسرو بختیار نے کہا ہے کہ حکومت نجی شعبے کی ترقی کیلئے کوشاں ہے اور مختلف شعبوں میں اصلاحات کیلئے کام کررہی ہے۔

تفصیلات کے مطابق وزیر اقتصادی امور خسرو بختیار کی ایشیائی ترقیاتی بینک کے نائب صدر سے ورچوئل اجلاس ہوا ہے جس میں وزیر اقتصادی امور خسرو بختیار نے بتایا ہے کہ ترقیاتی منصوبوں کی بروقت تکمیل اور قرض ،گرانٹ کی تقسیم کیلئے قومی رابطہ کمیٹی تشکیل دی گئی ہے۔

انہوں نے کہا ہے کہ تحفظ خوراک، انفراسٹرکچر اور دیگر شعبوں میں نجی شراکت داری کے مواقع موجود ہیں۔

اجلاس میں ملکی شراکت داری 2021-25 کی ترجیحات پر تبادلہ خیال کیا گیا جبکہ اے ڈی بی کی جانب سے 2021-23 کی کاروباری منصوبوں پر بھی تبادلہ خیال ہوا ہے۔

اجلاس میں اے ڈی بی کے نائب صدر کی پاکستان کو ہر ممکن تعاون کی یقین دہانی کرائی گئی ہے اور اے ڈی بی نے پاکستان کی کورونا سے نمٹنے کی حکمت عملی کو بھی سراہا، ہے۔

دوران اجلاس اے ڈی بی کا پاکستان کو اگلے پانچ سالوں میں منصوبوں کیلئے 10ارب ڈالر فراہم کرنے کا اعلان بھی کیا گیا ہے۔