گورنر سندھ عمران اسماعیل نے کہا ہے کہ عوامی فلاح و بہبود وزیر اعظم عمران خان کی اولین ترجیح ہے۔

تفصیلات کے مطابق گورنر سندھ عمران اسماعیل سے سیلانی ویلفئیر ٹرسٹ کے چیئرمین مولانا بشیر فاروقی نے گورنرہاﺅس میں ملاقات کی ہے۔

ملاقات میں سیلانی ویلفئیر ٹرسٹ کے مختلف منصوبوں پر تبادلہ خیال اور سیلانی کے تعاون سے صوبہ کے مختلف شہروں میں لنگر خانوں کے قیام کی پیش رفت کا جائزہ لیا گیا۔

ملاقات کے دوران مولانا بشیر فاروقی نے گورنر سندھ کو سیلانی ٹرسٹ کے مختلف منصوبوں کی پیش رفت سے آگاہ کیا۔

اس موقع پر گورنرسندھ گورنر سندھ عمران اسماعیل نے کہا کہ عوامی فلاح و بہبود کے لئے سیلانی ویلفئیر ٹرسٹ کی خدمات بے مثال ہیں جبکہ ملک کے مختلف اضلاع میں لنگر خانوں کے قیام میں سیلانی کا تعاون قابل تحسین ہے۔

عمران اسماعیل نے کہا کہ سماجی بھلائی کی غیر سرکاری تنظیمیں حکومت کا دست و بازو ہیں جن کی مدد اور تعاون کے باعث عوام کو زندگی کی بنیادی سہولیات کی فراہمی ممکن ہورہی ہے۔

گورنر سندھ نے یہ بھی کہا کہ پاکستان میں مخیر حضرات فلاحی کاموں میں بڑھ چڑھ کر حصہ لیتے ہیں بالخصوص کراچی کے مخیر حضرات کسی نیک مقصد میں تعاون  کرنے سے کبھی نہیں ہچکچاتے۔

عمران اسماعیل کا کہنا تھا کہ عوامی فلاح و بہبود وزیر اعظم عمران خان کی اولین ترجیح ہے یہی وجہ ہے کہ انہوں نے احساس پروگرام شروع کیا جس کی پاکستان کی تاریخ میں کوئی نظیر نہیں ملتی۔

گورنر سندھ عمران اسماعیل کا مزید کہنا تھا کہ کورونا کے دوران  لاک ڈاؤن سے متاثرہ افراد کو نقد رقم کی فراہمی بھی اس پروگرام کے تحت کی گئی اور سیلانی کے تعاون سے صوبہ کے مختلف مقامات پر لنگر خانوں کا قیام عمل میں لایا جائے گا۔

سیلانی ویلفئیر ٹرسٹ کے چیئرمین مولانا بشیر فاروقی کی گورنر سندھ عمران اسماعیل سے ہونے والی ملاقات میں سیلانی ٹرسٹ کے مشیر افضل چماڈیا بھی شریک ہوئے۔