آل پاکستان پرائیویٹ اسکولز ایسوسی ایشن کے صدر میاں شبیراحمد نے کہا ہے کہ گورنمنٹ کی طرف سے  دوبارہ اسکولز بند کرنے کا جلد بازی میں کیا گیا فیصلہ غیردانش مندانہ ہے۔

تفصیلات کے مطابق آل پاکستان پرائیویٹ اسکولز ایسوسی ایشن کے صدر میاں شبیراحمد نے اپنے ایک بیان میں کہا کہ ناقص تعلیمی پالیسیوں کی وجہ سے شرح خواندگی میں اضافہ پر فل سٹاپ لگا دیا گیا ہے۔

میاں شبیراحمد نے کہا کہ لاک ڈاؤن میں کم فیس پرائیویٹ اسکولز سب سے زیادہ متاثر ہوئے ہیں جبکہ تعلیم دشمن تباہی کے ذمہ داروں نے اپنا کوئی وعدہ پورا نہیں کیا۔

آل پاکستان پرائیویٹ اسکولز ایسوسی ایشن کے صدر نے یہ بھی کہا کہ پنجاب بھر میں لاک ڈاؤن کے دوران بند ہونے والے کم فیس پرائیویٹ سکولز کو ریلیف دینے کے بجائے تعلیم دشمن ہونے کا ثبوت دیا گیا۔

میاں شبیراحمد کا کہنا تھا کہ دوبارہ سکولز بند کرنے کا فیصلہ کم فیس پرائیویٹ سکولز کی تباہی ہے جبکہ اساتذہ کا معاشی استحصال اور طلباء کی تعلیمی تباہی ہے.

آل پاکستان پرائیویٹ اسکولز ایسوسی ایشن کے صدر میاں شبیراحمد کا مزید کہنا تھا کہ دوبارہ ادارے بند کرنے سے پہلے یہ ضرور دیکھ لیں کہ گزشتہ لاک ڈاؤن میں کم فیس پرائیویٹ سکولز کے ساتھ کیے گئے کتنے وعدے پورے کیے گئے ہیں لہذا دوبارہ سکولز بند کرنے کے بجائے متبادل حل نکالیں۔