معاون خصوصی ڈاکٹر ثانیہ نشتر نے برما ٹاؤن اسام آباد میں احساس ویمن ایمپاورمنٹ مرکز کا دورہ کیا، اس دوران ڈاکٹر ثانیہ نشتر نے زیر تربیت خواتین سے بات چیت کی اور ٹریننگ پروگراموں کی بہتری  کیلیئے ان کی تجاویز سنیں۔

اس موقع پر معاون خصوصی ڈاکٹر ثانیہ نشتر نے کہا کہ مرکز میں پاکستان بیت المال کی زیرنگرانی مستحق خواتین کو مختلف ہنر مفت سکھائے جاتے ہیں، چیدہ چیدہ کورسز میں کمپیوٹر، بیوٹیشن، سلائی کڑھائی اور ڈریس ڈیزائننگ شامل ہیں۔

ڈاکٹر ثانیہ نشتر نے یہ بھی کہا کہ ملک بھر میں 160ویمن ایمپاورمنٹ سنٹر قائم ہیں جبکہ ہر سینٹر میں سالانہ 250 خواتین تربیت پاتی ہیں تاکہ روزگار کما سکیں۔

معاون خصوصی ڈاکٹر ثانیہ نشتر نے مزید کہا کہ فارغ التحصیل خواتین کیلیئےایک لاکھ تک کے چھوٹے کاروباری قرضوں کی سہولت بھی میسر ہے اور یہ بلاسود قرضے احساس کے ذیلی ادارے پی پی اے ایف کے ذریعے فراہم کیئے جاتے ہیں۔

واضح رہے اس سے قبل وزیراعظم کی معاون خصوصی برائے سماجی تحفظ ڈاکٹر ثانیہ نشترنے نیشنل یونیورسٹی آف ٹیکنالوجی کا دورہ کیا تھا۔

ڈاکٹر ثانیہ نشتر نے یونیورسٹی کے طلباء سے بات چیت کی تھی اور ان کی تعلیمی خواہشات اور ان کو در پیش اہم مسائل سنے تھے۔

وزیر اعظم کی معاون خصوصی برائے سماجی تحفظ ڈاکٹر ثانیہ نشتر کا کہنا ہے کہ اگلے سال سے پرائمری اسکول جانے والے 4ملین بچے وسیلہ تعلیم پروگرام سے مستفید ہوں گے۔