امیر جماعت اسلامی سینیٹر سراج الحق نے کہا ہے کہ پی ٹی آئی حکومت غریب کے لیے ڈراونا خواب بن چکی ہے۔

تفصیلات کے مطابق امیر جماعت اسلامی سینیٹر سراج الحق نے اپنے ایک بیان میں کہا کہ غربت اور مہنگائی کے مارے عوام دن رات تبدیلی کو کوسنے پر مجبور ہیں۔

سینیٹر سراج الحق نے کہا کہ غریب روٹی کے لیے ترس رہے ہیں جبکہ معیشت کو پٹڑی پر ڈالنے کے دعوے کرنے والے آٹے دال کا بھاو معلوم کریں۔

امیر جماعت اسلامی نے یہ بھی کہا کہ تبدیلی کے دعویدارو نے اپنے آدھے دور حکومت میں ہی ملکی معیشت کا جنازہ نکال دیا ہے جبکہ بے روزگاری نے لاکھوں محنت کشوں اور مزدوروں کو سڑکوں پر کھڑا کر دیا ہے۔

سراج الحق کا کہنا تھا کہ اسٹیل ملز سے لے کر پاکستان ریلویز اور پی آئی اے وینٹی لیٹر پر جا چکے ہیں جبکہ بیڈ گورننس ،لاءاینڈ آرڈر کی مخدوش صورت حال تبدیلی حکومت کے تحفے ہیں۔

امیر جماعت اسلامی سینیٹر سراج الحق کا مزید کہنا تھا کہ پی ٹی آئی کی صوبائی حکومت کی ناک تلے آٹھ مریض آکسیجن نہ ملنے سے موت کے منہ میں چلے گئے، سانحہ کی فوری تحقیقات کی جائیں اور ذمہ داروں کو کٹہرے میں کھڑا کیا جائے۔