گورنر خیبرپختونخوا شاہ فرمان نے کہا ہے کہ ہر یونیورسٹی میں امتحانی پرچہ جات چیک کرنے کیلئے ایک علیحدہ کوالیفائیڈ پینل ہونا چاہیے۔

تفصیلات کے مطابق گورنر خیبرپختونخوا شاہ فرمان کی زیر صدارت خوشحال خان خٹک یونیورسٹی کرک کا7واں اور باچاخان یونیورسٹی چارسدہ کا چوتھا سینٹ کا الگ الگ اجلاس ہوا جس میں گورنر نے تمام صوبائی پبلک سیکٹرز یونیورسٹیوں کو ڈرگ کے استعمال کی روک تھام، ریاست مخالف سرگرمیوں کی بیخ کنی کی ہدایت دی۔

گورنرخیبرپختونخوا نے کہا کہ یونیورسٹیوں میں ایک ڈیپارٹمنٹ کے امتحانی پیپر اسی ڈیپارٹمنٹ کے اساتذہ چیک نہیں کریں گے بلکہ امتحانی پرچہ جات چیک کرنے کیلئے ایک علیحدہ کوالیفائیڈ پینل ہونا چاہیے۔

شاہ فرمان نے یہ بھی کہا کہ امتحانی پرچہ جات، چیک کرنے کے نظام میں تبدیلی کامقصد پیپرچیکنگ میں شفافیت اورطلبہ کااعتماد بحال رکھنا ہے۔

گورنرخیبرپختونخوا کا کہنا تھا کہ تمام یونیورسٹیاں طلباء بالخصوص طالبات اور ٹیچنگ فیکلٹی کیلئے ڈریس کوڈ لازمی قراردیں جبکہ یونیورسٹیوں کو اختیارحاصل ہے کہ وہ اپنی پسند اورمرضی کے مطابق ڈریس کوڈ کاانتخاب کریں۔

شاہ فرمان کا یہ بھی کہنا تھا کہ ڈریس کوڈ لازمی قرار دینے کا مقصد طلبہ پرسوشل چیک اور نت نئے لباس کی مدمیں والدین اورطلبہ پراخراجات کابوجھ کم کرنا ہے۔

گورنرخیبرپختونخوا شاہ فرمان کا مزید کہنا تھا کہ یونیورسٹیوں میں غیرضروری تعمیرات پرپیسے خرچ ہونے سے مالی بوجھ طلبہ کو اٹھانا پڑتا ہے، یونیورسٹیوں کو اپنے بجٹ کی تیاری میں ترجیحات کو مدنظر رکھنا چاہئے، بجٹ کا درست ترجیحات کے مطابق استعمال نہ ہونے سے یونیورسٹیاں مالی مسائل کا شکار ہیں۔