وزیر کالونیز و جیل خانہ جات پنجاب فیاض الحسن چوہان نے کہا ہے کہ پی ڈی ایم صرف تصادم کی سیاست کو فروغ دے رہی ہے۔

تفصیلات کے مطابق وزیر کالونیز و جیل خانہ جات پنجاب فیاض الحسن چوہان نے لاہور میں پی ڈی ایم کے ناکام جلسے کے حوالے سے ردعمل دیتے ہوئے کہا کہ لاہور نے سیاسی کرپشن اور بددیانتی کی بارش میں بھیگی پی ڈی ایم قیادت کو ناکام و نامراد کر دیا۔

وزیر کالونیزوجیل خانہ جات پنجاب نے کہا کہ جرات مند اور غیرت مند لاہوریوں نے ایک بار پھر آل پاکستان لوٹ مار ایسوسی ایشن کو آئینہ دکھا دیا جبکہ مودی اور اجیت دیول کا بیانیہ لیکر آنے والی پی ڈی ایم کو شرم سے چلو بھر پانی میں ڈوب مرنا چاہیئے۔

فیاض الحسن چوہان نے یہ بھی کہا کہ عوام کو منظم کرنے کے دعویدار خود آپس میں تصادم کا شکار نظر آئے،مولانا فضل الرحمن کو خجالت مٹانے کے لیے جا کر دریائے راوی میں ڈبکیاں لگانی چاہیے۔

وزیر کالونیزوجیل خانہ جات پنجاب کا کہنا تھا کہ زندہ دل اہلیان لاہور کے لیے زندہ باد کے نعرے لگنے چاہیے جبکہ پی ڈی ایم کی عوام میں مقبولیت کا بھانڈا بیچ گریٹر اقبال پارک پھوٹ گیا۔

فیاض الحسن چوہان کا یہ بھی کہنا تھا کہ بلاول زرداری کے استقبال کے لیے پچاس سے زیادہ کارکنان نہ پہنچے جبکہ مولانا فضل الرحمن کے متوالے ن لیگی قائدین کو جلسہ گاہ داخلے پر ذلیل کرتے رہے۔

وزیر کالونیز و جیل خانہ جات پنجاب فیاض الحسن چوہان کا مزید کہنا تھا کہ پی پی کے جیالے بیگم صفدر اعوان کی تصاویر کے ساتھ بلاول زرداری کی تصاویر نہ ہونے پر مغلظات بکتے رہے اور تین سو روپے دیہاڑی پر لوگوں کو بلا کر پیپلز پارٹی نے آج بھی غریب عوام کا مذاق اڑایا۔