معاون خصوصی برائے سیاسی ابلاغ ڈاکٹر شہباز گِل نے کہا ہے کہ نااہل لیگ کے درباری عوام کو گمراہ کرنے میں مصروف ہیں۔

 تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مریم اورنگزیب کے بیان پر ردعمل دیتے ہوئے کہا کہ بہت جلد نااہل لیگ کو سیاست کرنے کے لیے کچھ اور چورن تلاش کرنا پڑے گا۔

معاون خصوصی برائے سیاسی ابلاغ نے کہا کہ کورونا کی وجہ سے پوری دنیا میں فوڈ سیکورٹی تھریٹ پیدا ہوا لیکن پی ڈی ایم میں موجود بدطینت اس معاملے پر بھی سیاست سے باز نہیں آرہے۔

اپنے بیان میں ڈاکٹر شہباز گِل نے یہ بھی کہا کہ رواں برس گلوبل اکانومی صدی کی بدترین کساد بازاری کا شکار رہی۔

معاون خصوصی برائے سیاسی ابلاغ ڈاکٹر شہباز گِل نے مزید کہا کہ حکومت کی بہترین حکمت عملی کی وجہ سے پاکستان میں حالات نسبتاً بہتر رہے، پاکستان میں نا صرف حالات باقی ممالک سے بہتر رہے بلکہ اکانومی نے بھی بہت تیزی سے ریکوری کی۔