امیر جماعت اسلامی سراج الحق نے کہا ہے کہ پی ٹی آئی کی صورت میں ایک مصیبت عوام پر مسلط ہے۔

تفصیلات کے مطابق امیر جماعت اسلامی سراج الحق نے چولستان میں خطاب کرتے ہوئے کہ کہ چولستان ترقیاتی ادارے کے نام پر اربوں روپے کے فنڈز کو حکومتی نمائندوں نے ہڑپ کرلیا ہے۔

سراج الحق نے کہا کہ چولستان ترقیاتی ادارے کے فنڈز کا شفاف آڈٹ کروایا جائے اور چولستان کو الگ ضلع بنایا جائے۔

امیر جماعت اسلامی نے یہ بھی کہا کہ حکمران ٹولے نے لاکھوں لوگوں سے روزگار چھین لیا جبکہ جاگیرداروں اور استعمار کے نمائندوں نے چولستان کو غیر ملکی شہزادوں کے حوالے کردیا ہے۔

 سراج الحق کا کہنا تھا کہ غریب زندہ رہنے کے لیے خوراک خرید سکتاہے نہ دوائی جبکہ لینڈ ، ڈرگ ، شوگر اور آٹا مافیا کا راج ہے اور عوام بے بس۔

امیر جماعت اسلامی کا یہ بھی کہنا تھا کہ تحریک انصاف کی حکومت نے گزشتہ 850 دنوں میں عوام کو غربت ، بے روزگاری ، مہنگائی کے تحفے دیے۔

سراج الحق نے اپنے بیان میں حکومت پر تنقید کرتے ہوئے کہا کہ تحریک انصاف نے سابقہ حکمرانوں کی عوام دشمن پالیسیوں کومزید اضافے کے ساتھ جاری رکھے ہوئے ہے۔

امیر جماعت اسلامی سراج الحق نے مزید کہا کہ جماعت اسلامی حکومت کی عوام دشمن پالیسیوں کے خلاف اپنی تحریک جاری رکھے گی جبکہ تحریک کے دوسرے فیز کا آغاز کچھ روز بعد گوجرانوالہ سے ہو گا۔