پی ٹی آئی کراچی کے صدر خرم شیرزمان نے کہا ہے کہ پی ٹی آئی کی حکومت کسی شخصیت کے لیے نہیں اس ملک کے لیے جدوجہد میں مصروف ہے۔

تفصیلات کے مطابق صوبائی وزیر اطلاعات ناصر حسین شاہ کے بیان پر پی ٹی آئی کراچی کے صدر خرم شیرزمان نے رد عمل دیتے ہوئے کہا کہ صوبائی وزیر پاکستانی تاریخ کے سب سے نااہل ترین وزیر ہیں۔

خرم شیرزمان نے کہا کہ لاہور میں بھاشن دینے والوں نے بھٹو کے شہر لاڑکانہ کو ایڈز میں مبتلا کردیا ہے جبکہ لاشوں پر سیاست کرنے والے اب عوام کو مارنے کے لیے جلسے کررہے ہیں۔

پی ٹی آئی کراچی کے صدر نے یہ بھی کہا کہ لاڑکانہ میں رواں ماہ کتوں کے کاٹنے کے واقعات 5سو سے زائد ہوچکے ہیں جبکہ صوبائی وزیربھول گئے کے ان کے پارٹی سربراہ کو ٹین پرسنٹ اور دولہا بھائی جیسے القاب مل چکے ہیں۔

خرم شیرزمان کا کہنا تھا کہ سندھ حکومت سندھ کی عوام کو تعلیم صحت روزگار محروم رکھ کر غلام بناکر رکھنا چاہتی ہے جبکہ موروثی سیاست کے پیکر عوام کو کورونا میں جھونکنے کی سازش کررہے ہیں۔

پی ٹی آئی کراچی کے صدر خرم شیرزمان کا مزید کہنا تھا کہ پی پی کے قذاقوں سے سندھ کی عوام کو نجات دلانے کے لیے وزیراعظم عمران خان کی قیادت میں جدوجہد جاری رکھیں گے۔