وزیرتعلیم سندھ سعید غنی نے کہا ہے کہ حکومتی نااہلی سے معیشت کی بری صورتحال ہے۔

تفصیلات کے مطابق وزیرتعلیم سندھ سعید غنی نے پریس کانفرنس کرتے ہوئے کہا کہ حکومت کی دھمکیوں کے باوجود پی ڈی ایم کے جلسوں میں عوام بھرپور شرکت کر رہے ہیں۔

وزیرتعلیم سندھ نے کہا کہ انکی نااہلی سے پیٹرولیم بحران آیا جبکہ حکومت کا ایل این جی اسکینڈل بھی سامنے آیا ہے، نااہلوں نے گیس قلت پوری کرنے کے لیے کوئی حکمت عملی نہیں بنائی۔

سعید غنی نے یہ بھی کہا کہ جنوری کے لیے ایل این جی نہیں خریدی اور اب جنوری کے لیے مہنگی ایل این جی کے آرڈر دے رہے ہیں۔

وزیرتعلیم سندھ کا کہنا تھا کہ حکومت میں بیٹھے لوگوں کی نا اہلی سے چند ماہ میں ملکی خزانے کو 15 ارب روپے کا ٹیکا لگ چکا ہے جبکہ مہنگی ایل این جی خریدنے کا اثر عوام کی جیبوں پر پڑے گا۔

سعید غنی کا یہ بھی کہنا تھا کہ حکومت کو الیکشن فنڈنگ کرنے والے لوگوں کے خلاف یہ کارروائی نہیں کر رہے جبکہ کے الیکٹرک کو ہی دیکھیں اسکے خلاف مہنگی بجلی اور لوڈشیڈنگ پر کوئی کارروائی نہیں کر رہے۔

وزیرتعلیم سندھ سعید غنی کا مزید کہنا تھا کہ کے الیکٹرک کا مالک عارف نقوی عمران خان کا دوست ہے اسی لیے یہ کے الیکٹرک کے خلاف کوئی ایکشن نہیں لے رہے۔