کمشنر و ایڈمنسٹریٹر کراچی افتخار شالوانی نے کہا ہے کہ انفراسٹر کچر ڈویلپمنٹ میں سڑکوں کی بہتری اولین ترجیح ہے۔

تفصیلات کے مطابق کمشنر و ایڈمنسٹریٹر کراچی افتخار شالوانی نے اولمپیئن اصلاح الدین روڈ اور علامہ شبیر احمد عثمانی روڈ کی بحالی و تعمیر کا سنگ بنیاد رکھ دیا۔

کمشنر و ایڈمنسٹریٹر کراچی افتخار شالوانی نے ہدایت کی کہ سڑک کی تعمیر کے ساتھ علاقے کی بیوٹیفیکیشن پر بھی توجہ دی جائے۔

کمشنر و ایڈمنسٹریٹر کراچی نے کہا کہ ٹائم اسکوائر تا ڈسکو بیکری اولمپیئن اصلاح الدین روڈ کی کل لمبائی 3200 رننگ اسکوائر فٹ ہے، علامہ شبیر احمد عثمانی روڈ مسکن چورنگی سے گلشن فلائی اوور تک تعمیر ہوگا، سیوریج لائن بھی ڈالی گئی ہے۔

افتخار شالوانی نے یہ بھی کہا کہ علامہ شبیر احمد عثمانی روڈ کی لمبائی 6ہزار رننگ اسکوائر فٹ ہے جس کی چوڑائی 60 فٹ تک کردی گئی ہے، اولمپیئن اصلاح الدین روڈ اور علامہ شبیر احمد عثمانی روڈ کے اطراف سے ہر قسم کی تجاوزات ختم کی جائیں۔

 کمشنر و ایڈمنسٹریٹر کراچی افتخار شالوانی نے مزید کہا کہ اولمپیئن اصلاح الدین روڈ کی حالت انتہائی خراب تھی، جگہ جگہ گڑھے پڑے ہوئے تھے، ازسرِنو نو تعمیر کے بعد اولمپیئن اصلاح الدین روڈ کی چوڑائی 34 فٹ سے بڑھ کر 40 فٹ ہو جائے گی جبکہ سیوریج اور واٹر لائن کی تبدیلی کے ساتھ سڑک کی از سر نو تعمیر سے علاقے کے لاکھوں افراد کو سہولت فراہم ہو گی۔