شوبز کی جہاں بہت سی شخصیات ایک دوسرے سے راہیں جدا کرتی نظر آئیں، وہیں کئی شخصیات عالمی وبا کے دوران بھی ازدواجی بندھن میں بندھتے دکھائی دیے۔

یاد رہے کہ رواں سال تھوڑی حسین اور زیادہ غمگین یادوں کے ساتھ جہاں اپنے اختتام کی جانب رواں دواں ہے وہی دنیا بھر کے لیے ایک بہت بڑی تبدیلی چھوڑے جارہا ہے۔

آئیے جانتے ہیں کہ 2020 میں پاکستان کی کونسی مشہور شوبز شخصیات شادی کے بندھن میں بندھ گئیں۔

2020 میں شادی کے بندھن میں بندھنے والی شوبز شخصیات کی فہرست پر نظر ڈالتے ہیں۔

پاکستان شوبز انڈسٹری کی معروف جوڑی سجل علی اور احد رضا میر رواں برس حقیقی زندگی میں ایک ہونے والی سرفہرست جوڑیوں میں شامل ہیں، اداکار جوڑی مارچ کے مہینے میں ابوظہبی کے قریب جزیرے پر سادہ سی تقریب میں نکاح کے بندھن میں بندھے۔

رواں برس اپریل کے ماہ میں مقبول ترین 70 سالہ اداکارہ ثمینہ احمد اور اداکار منظر صہبائی بھی رشتہ ازدواج میں منسلک ہوئے۔

نکاح کی تقریب لاہور میں سادگی سے ہوئی، جس میں صرف ان کے گھر والوں نے شرکت کی ۔

رواں برس اپریل کے مہینے میں اداکارہ نمرہ خان ، راجا افتخار کے ساتھ شادی کے بندھن میں بندھ گئیں، نمرہ خان راجا افتخارکے ساتھ 19 اپریل کو رشتہ ازدواج میں منسلک ہوئیں۔

مئی کے مہینہ کافی خوشگوار رہا اور تین شادیاں ایک کے ایک ہوتی چلی گئی، جن میں سب سے پہلے اداکارہ حنا الطاف اور اداکار آغا علی شادی کے بندھن میں بندھیں، اس سے قبل آغا علی اور اداکارہ سارا خان کا کپل سوشل میڈیا پر کافی مقبول رہا تھا۔

اس کے علاوہ اداکار شہروز سبزواری اور ماڈل گرل صدف کنول گھر میں منعقدہ سادہ سی تقریب میں ازدواجی بندھن میں منسلک ہوگئے۔

شہروز سبزواری کی دوسری جبکہ ماڈل صدف کنول کی یہ پہلی شادی تھی اور شادی سے قبل دونوں کے تعلقات کا سوشل میڈیا پر خوب چرچا رہا۔

اس ہی طرح ایک اور پاکستانی جوڑے نے سادگی کے ساتھ خاموشی سے شادی کرلی اور وہ ہیں اداکار دانیال راحیل اور فریال محمود، جنھوں نے لاہور میں چند افراد کی موجودگی میں شادی کی۔

اداکارہ سارہ خان رواں برس جولائی میں گلوکار فلک شبیر کی شریک حیات بن گئیں، سارہ خان نے گلوکار فلک شبیر کے ساتھ نکاح کیا اور ہیش ٹیگ فلک کی دلہن سوشل میڈیا پر خوب وائرل ہوا۔

جبکہ اگست میں اداکارہ و ماڈل آمنہ شیخ نے بھی معروف بزنس مین اورکوڈ مائنڈز کمپنی کے بانی عمر فاروقی کے ساتھ دوسری شادی کرلی، آمنہ شیخ نے اپنے انسٹاگرام اکاؤنٹ پر انگوٹھی کی تصویر لگائی اور پھر دوسری شادی کی تصدیق کرتے ہوئے چند تصاویر بھی شیئر کی تھی۔

رواں برس اکتوبر میں خوبرو اداکارہ ثناء جاوید نے گلوکار عمیر جسوال کو اپنا جیون  ساتھی بنایا، ثنا جاوید نے اپنے انسٹاگرام اکاؤنٹ پر شادی کی تصویر شیئر کرتے ہوئے مداحوں کو اپنی شادی کی اطلاع دی۔

واضح رہے کہ 2020   کی آخری شادی ماہ نومبر میں ہوئی، اداکارہ رباب ہاشم نے صہیب شمشاد نامی شخص کے ساتھ شادی کر کے مداحوں کو حیران کردیا، ان کی مہندی اور نکاح کی تصاویر بھی سوشل میڈیا پر وائرل ہوئیں۔