وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان کا کہنا ہے کہ اپوزیشن واویلا ڈال رہی ہے کہ تبدیلی کہاں ہے۔

جہلم میں پریس کانفرس کرتے ہوئے فردوس عاشق اعوان کا کہنا تھا کہ وزیراعلیٰ کی ہدایت پر تمام ڈسٹرکٹ ہیڈ کوارٹرز کا دورہ کیا جا رہا ہے، اپوزیشن واویلا ڈال رہی ہے کہ تبدیلی کہاں ہے، انتظامیہ اور سیاسی قیادت ایک پیج پرہیں، جوعوامی نمائندے ہیں ان کو انتظامی ادارے جوابدہ ہیں، اگر انتظامی افسران اپ کے سامنے جوابدہ ہیں، تبدیلی یہ ہے کہ ہم دور دراز کے علاقوں اور غریب طبقے کی فلاح کے لیے کام کر رہے ہیں۔

انہوں نے کہا کہ پنجاب بڑا بھائی ہوتے ہوئے اپنا کردار ادا کررہا ہے، ہم دیہات کے اندر سہولیات کے لیے اقدامات کر رہے ہیں، تاکہ دیہات سے لوگ شہروں کا رخ نہ کریں، عثمان بزدار کا ویژن ہے کہ دیہات کو وہ سہولیات فراہم کی جائیں جو شہروں کو میسر ہیں، پبلک پرائیویٹ سیکٹر کا حسین امتزاج ہے، جہلم میں سماجی کاموں میں بڑھ چڑھ کر حصہ لیا جاتا یے، ماضی میں جہلم کے ساتھ سوتیلی ماں جیسا سلوک کیا جا رہا تھا، ماضی میں چند خاندان حکومت کرتے رہے ہیں،جہلم کے ایم پی ایز کی کارکردگی کو عثمان بزدار قدر کی نگاہ سے دیکھتے ہیں، ہمیں اس بات کا احساس ہے کہ کورونا کی وجہ سے مہنگائی میں اضافہ ہوا ہے، کورونا کے باوجود عمران خان نے احسن طریقے سے معیشت کو سنبھالا۔

فردوس عاشق اعوان نے مزید کہا کہ قبضہ مافیا  ذخیرہ اندوز ہماری حکومت سے خوش نہیں ہیں، یہ لوگ زمین پر قبضے کررہے تھے اب ہم نے واگزار کروانا شروع کیا ہے، ذخیرہ اندوزوں کے خلاف بلا تفریق کارروائیاں جاری ہیں، وزیر اعظم عمران خان نے احتساب کا عمل اپنی جماعت سے شروع کیا، تاریخ میں نہیں کہ کوئی حکومت اپنے ہی وزراء کے خلاف شفاف انکوائریاں کروائیں ہوں، عمران  خان نے اس معاملے پر اپنے وزراء اور پارٹی رہنماوں سے بھی رعایت نہیں کی۔