وزیراعظم عمران خان نے کہا ہے کہ مہنگائی کا بوجھ ممکنہ حد تک کم کیا جائے۔

تفصیلات کے مطابق وزیراعظم عمران خان کی زیر صدارت اعلیٰ سطحی اجلاس ہوا جس میں بنیادی اشیائے ضروریہ خصوصاً آٹے کی قیمت میں استحکام پر گفتگو کی گئی جبکہ چینی کی موجودہ قیمتوں میں کمی لانے کے حوالے سے اقدامات ، گیس اور پٹرول کی قیمتوں کے حوالے سے معاملات پر بھی غور کیا گیا۔

اجلاس میں وزیرِاعظم کو چینی کی قیمت میں کمی لانے کے حوالے سے مجوزہ اقدامات پر بریفنگ دی گئی جبکہ بین الاقوامی منڈی میں پٹرولیم مصنوعات کی قیمتوں کے حوالے سے بھی بریفنگ دی گئی۔

معاون خصوصی برائے پٹرولیم ندیم بابر نے گیس کی قیمتوں کے حوالے سے بریفنگ دیتے ہوئے کہا کہ گیس کی قیمتوں میں یکم جولائی 2019 میں اضافہ کیا گیا تھا، اوگرا کی جانب سے گیس قیمتوں میں چھ سے سات فیصد اضافے کی سفارش کی گئی ہے۔

اجلاس کی صدارت کرتے ہوئے وزیراعظم عمران خان نے کہا کہ آئندہ چند ماہ تک گیس کی قیمت میں اضافہ نہ کیا جائے جبکہ عام آدمی اور خصوصاً نچلے طبقے کو ہر ممکنہ ریلیف پہنچانے کی کوششیں مزید تیز کی جائے۔

 وزیراعظم نے کہا کہ ٹارگیٹڈ سبسڈی سکیم متعارف کئے جانے تک آٹے کی قیمتوں میں استحکام کو یقینی بنایا جائے جبکہ آٹے کی خریداری کے حوالے سے معاشرے کے کمزور طبقوں کو حکومت کی جانب سے براہ راست سبسڈی فراہم کی جائے گی۔

وزیراعظم نے یہ بھی کہا کہ حکومتی سبسڈی کا مقصد معاشرے کے کمزور طبقات کی مالی معاونت ہے جبکہ غریب افراد کو آٹے کے حوالے سے براہ راست سبسڈی کی فراہمی کے لئے مفصل پروگرام متعارف کرایا جا رہا ہے۔

 وزیراعظم عمران خان نے مزید کہا کہ آٹا بنیادی ضرورت ہے اس کی وافر اور مناسب قیمت میں دستیابی کو یقینی بنایا جائے جبکہ مستقبل  میں گندم کی ضروریات کو مدنظر رکھتے ہوئے حکومتی و نجی شعبے کی جانب سے درآمد کے فیصلے بروقت لیے جانے کو یقینی بنایا جائے۔

اجلاس میں مخدوم خسرو بختیار، ڈاکٹر عبدالحفیظ شیخ، محمد حماد اظہر، سید فخر امام ، عمر ایوب، اسد عمر ، ندیم بابر، ڈاکٹر وقار مسعود، تابش گوہر ، سابق وزیرخزانہ شوکت ترین، وفاقی سیکرٹریز و دیگر سینئر افسران شریک ہوئے۔