کورونا کے مسلسل بڑھتے ہوئے کیسز کی وجہ سے سندھ حکومت نے کورونا ایس او پیز سے متعلق نیا حکم نامہ جاری کردیا ہے۔

تفصیلات کے مطابق کورونا وائرس کے پیش نظر ایس او پی سے متعلق محکمہ داخلہ سندھ نے حکم نامہ جاری کردیا، نئی ایس او پیز کا اطلاق 11 اپریل تک ہوگا۔

حکم نامہ کے مطابق سندھ میں 6 اپریل سے شادی کی تقریبات پر پابندی عائد کردی گئی جس کے تحت شادی کی انڈور اور آؤٹ ڈور کی تقریبات پر پابندی ہوگی۔

حکم نامہ میں کہا گیا ہے کہ جلسے جلوسوں سمیت سماجی تقریبات پر مکمل پابندی عائد کردی گئی جبکہ جن علاقوں میں 8 فیصد کورونا کیسز ہیں وہاں لاک ڈاؤن کیا جائے، ان علاقوں میں نقل وحرکت بھی محدود ہوگی۔

حکم نامہ میں یہ بھی کہا گیا ہے کہ مارکیٹیں اور شاپنگ مال 6 بجے سے 10 بجے تک کھلی رہیں جبکہ ریسٹورنٹ میں اندر کھانے پر پابندی ہوگی صرف ریسٹورنٹ رات 10 بجے تک ٹیک اوے اور آؤٹ ڈور ڈائننگ کے ساتھ کھلے رکھنے کی اجازت ہے۔

محکمہ داخلہ سندھ کی جانب سے جاری کردہ حکم نامہ میں مزید کہا گیا ہے کہ کاروباری مراکز صبح 6 تا رات 8 بجے تک کھلے رکھنے کا فیصلہ کیا ہے جبکہ دفاتر اور پبلک پلیس پر ماسک لازمی ہے اور50 فیصد اسٹاف گھروں سے کام کرے گا۔