وزیراعلیٰ پنجاب سردار عثمان بزدار نے کہا ہے کہ کورونا وائرس سے نمٹنے کیلئے ہر طبقے کو اپنا موثر کردار ادا کرنا ہوگا۔

تفصیلات کے مطابق وزیراعلیٰ پنجاب سردار عثمان بزدار نے اپنے ایک بیان میں کہا کہ کورونا کی تیسری لہر کے باعث مریضوں کی تعداد میں بے پناہ اضافہ ہو رہا ہے، انسداد کورونا کیلئے حکومتی گائیڈلائنز پر عمل کرنا شہریوں کے مفاد میں ہے-

سردار عثمان بزدار نے کہا کہ پنجاب میں اب تک3,755,082کورونا ٹیسٹ کئے جا چکے ہیں جبکہ گزشتہ 24گھنٹے کے دوران کورونا کے19377 ٹیسٹ کئے گئے جن میں کورونا کے مزید 2823 نئے مریض سامنے آئے۔

وزیراعلیٰ پنجاب نے یہ بھی کہا کہ پنجاب میں گزشتہ 24 گھنٹے کے دوران پنجاب میں کورونا کے39 مریضوں کا انتقال ہوا جس کے بعد صوبے میں اب تک کورونا سے جاں بحق ہونے والے افرد کی تعداد 6227 ہوگئی ہیں۔

سردار عثمان بزدار کا کہنا تھا کہ شہری ماسک کو اپنی زندگی کا حصہ بنا لیں، حفاظتی تدابیر اختیار کرنا ہی کورونا وائرس سے نمٹنے کا موثر ذریعہ ہے۔

وزیراعلیٰ پنجاب کا یہ بھی کہنا تھا کہ پنجاب حکومت نے کورونا وائرس سے نمٹنے کیلئے موثر اور بروقت اقدامات کئے ہیں، عوام کی حفاظت کیلئے آئندہ بھی مزید اقدامات کرتے رہیں گے۔

سردار عثمان بزدار نے کہا کہ غیر معمولی حالات غیر معمولی اقدامات کے متقاضی ہیں، عوام کی زندگیوں کے تحفظ کیلئے پابندیاں مزید سخت کی جاسکتی ہیں۔

وزیراعلیٰ پنجاب سردار عثمان بزدار نے مزید کہا کہ ایس او پیز پر عملدر آمد  کرنے میں ہی صحت اور زندگیوں کا تحفظ ہے، عوام سے اپیل ہے کہ وہ حکومتی اقدامات کا بھرپور ساتھ دیں۔