سی سی پی او احسن عباس نے کہا ہے کہ ضلعی انتظامیہ کی جانب سے ماسک کے حوالے سے دفعہ 144 لاگو کیا گیا ہے۔

تفصیلات کے مطابق سی سی پی او احسن عباس نے اپنے بیان میں کہا کہ پشاور پولیس کورونا وائرس کی روک تھام کے لئے متحرک ہے۔

احسن عباس نے کہا کہ دو روز کے دوران ماسک استعمال نہ کرنے والے 134 افراد کے خلاف کارروائی کی گئی ہے۔

انہوں نے یہ  بھی کہا کہ آج مزید 82 افراد کے خلاف ماسک نہ پہننے پرکارروائی کی گئی ہے جبکہ پولیس کی جانب سے ماسک نہ پہننے والوں کے خلاف کارروائی کے ساتھ ساتھ شہریوں میں مفت فیس ماسک بھی تقسیم کئے گئے ہیں۔

احسن عباس کا کہنا تھا کہ وائرس کے بارے میں  آگاہی اور ماسک کے استعمال کو یقینی بنانے کے لئے کپیٹل سٹی پولیس کی جانب سے سوشل میڈیا کا سہارا بھی لیا جا رہا ہے۔

سی سی پی او احسن عباس نے مزید کہا کہ شہری ماسک کے استعمال کو یقینی بنا کر وائرس کو مزید پھیلنے سے روک سکتے ہیں۔