وزیر جیل خانہ جات پنجاب فیاض الحسن چوہان نے کہا ہے کہ بیگم صفدر اعوان اپنی نیب پیشی کے موقع پر قانون ہاتھ میں لینے سے باز رہیں۔

تفصیلات کے مطابق وزیر جیل خانہ جات پنجاب فیاض الحسن چوہان نے بیگم صفدر اعوان کی نیب پیشی کے حوالے سے بیان پر ردعمل دیتے ہوئے کہا کہ زیر تفتیش کے فیصلے اور نیب پر اثر انداز ہونے کا مطلب قانون اور انصاف کی راہ میں رکاوٹ ڈالنا ہے۔

فیاض الحسن چوہان نے کہا کہ نیب کی دفعہ 31 کے تحت ایسا فعل دس سال تک قید بامشقت سزا کا حامل قابل دست اندازی جرم ہے۔

وزیر جیل خانہ جات پنجاب نے یہ بھی کہا کہ نیب ایسے کیس میں جس میں حفاظتی ضمانت دی گئی ہو، ملزم کو گرفتار نہیں کر سکتا لیکن جب زیر تفتیش ملزم اپنی پیشی پر یا اس سے قبل تفتیش پر اثر انداز ہو تو سیکشن 31 لاگو ہوتا ہے۔

فیاض الحسن چوہان کا کہنا تھا کہ بیگم صفدر اعوان ن لیگ کے چلاف کرپشن کے ہر کیس کو سیاسی رنگ میں رنگنے کی کوشش کر رہی ہیں۔

وزیر جیل خانہ جات پنجاب فیاض الحسن چوہان کا مزید کہنا تھا کہ نیب کا عزم نصاف کے تقاضے پورے کرنا ہے، شریف خاندان کی شاہانہ خواہشات نہیں۔