انسداددہشت گردی عدالت نے موٹروے گینگ ریپ کیس کا فیصلہ محفوظ کرلیا جو بیس مارچ کو سنایا جائے گا۔

تفصیلات کے مطابق موٹروے گینگ ریپ کیس کے حوالے سے انسداددہشت گردی عدالت کے جج ارشد حسین بھٹہ نے کیمپ جیل میں کیس کی سماعت کی۔

عداکت میں قاسم ارائیں اور شیرگل قریشی  نے ملزموں کے دفاع میں دلائل دیئے۔

پراسکیوشن ٹیم نے ملزموں کیخلاف دلائل دیئے کہ ملزموں کیخلاف ٹھوس شواہد موجود ہیں اور ملزموں کا ڈی این اے جائے وقوعہ سے میچ کر کے گرفتار کیا گیا۔

پراسکیوشن کا کہنا تھا کہ ملزم شفقت علی نے مجسٹریٹ کے سامنے اپنا جرم قبول کرلیا جبکہ ملزم عابد ملہی کو متاثرہ خاتون نے مجسٹریٹ کے سامنے شناخت کیا۔

پراسکیوشن نے استدعا کی کہ ملزموں نے سنگین جرم کا ارتکاب کیا، شواہد کے روشنی میں قانون کے مطابق سزا دی جائے۔

عدالت نے دلائل سننے کے بعد ملزم عابد ملہی اور شفقت علی کیخلاف فیصلہ محفوظ کرلیا جو  ہفتے کو سنایا جائے گا۔

واضح رہے کہ 9 ستمبر کو لاہور کے علاقے گجر پورہ میں موٹر وے پر خاتون کو اجتماعی زیادتی کا نشانہ بنانے کا واقعہ پیش آیا تھا۔

ایف آئی آر کے مطابق ایک خاتون اپنے تین بچوں کے ہمراہ  گجرانوالہ سے لاہور جارہی تھیں، راستے میں گاڑی کا پیٹرول ختم ہونے کی وجہ سے انہیں سڑک کنارے رکنا پڑا۔

کار کا پٹرول ختم ہونے کے باعث موٹروے پر گاڑی روک کر خاتون شوہر کا انتظار کر رہی تھی، پہلے خاتون نے اپنے ایک رشتے دار کو فون کیا، رشتے دار نے موٹر وے پولیس کو فون کرنے کا کہا۔

خاتون نے موٹروے پولیس کو فون کیا مگر موٹر وے پولیس نے مبینہ طور پر کہا کہ کوئی ایمرجنسی ڈیوٹی پر نہیں ہے۔

اسی اثناء میں  دو افراد نے موٹر وے پر کھڑی گاڑی کا شیشہ توڑ کر خاتون اور اس کے بچوں کو نکالا، موٹر وے کے گرد لگی جالی کاٹ کر سب کو قریبی جھاڑیوں میں لے گئے اور پھر خاتون کو بچوں کے سامنے زیادتی کا نشانہ بنایا اور نقدی و قیمتی سامان چھین لیا۔