پاکستان پیپلزپارٹی کے چیئرمین بلاول بھٹو زرداری نے کہا ہے کہ زندگی کے تمام شعبہ جات میں خواتین کا کردار اہمیت کا حامل ہے۔

پاکستان پیپلزپارٹی کے چیئرمین بلاول بھٹو زرداری کی بلاول ہاؤس میں عورت مارچ کے منتظمین سے ملاقات ہوئی جس میں چیئرمین بلاول بھٹو زرداری کو عورت مارچ کے منتظمین نے جھوٹے پروپیگنڈے کے تناظر میں لاحق سیکیورٹی خدشات و دیگر مسائل سے آگاہ کیا۔

اس موقع پرچیئرمین بلاول بھٹو زرداری کی عورت مارچ کے منتظمین سے بلاول ہاؤس میں ہونے والی ملاقات میں خواجہ سرا کمیونٹی کے نمائندے نے بھی مسائل سے آگاہ کیا۔

ملاقات میں چیئرمین بلاول بھٹو زرداری نےعورت مارچ کے منتظمین کے مطالبات کو سنا، سندھ حکومت کی جانب سے حقوقِ نسواں کی حمایت کے تسلسل کی یقین دہانی کرائی۔

چیئرمین بلاول بھٹو زرداری نے عورت مارچ کے منتظمین کی جانب سے دھمکیاں ملنے کے تذکرے پر شہید محترمہ بینظیر بھٹو کے جرات مندانہ کردار کا تذکرہ کیا۔

ملاقات میں  گفتگو کرتے ہوئے پاکستان پیپلزپارٹی کے چیئرمین بلاول زرداری نے کہا کہ زندگی کے تمام شعبہ جات میں خواتین کا کردار اہمیت کا حامل ہے، خواتین کی توانا آوازوں نے ان عناصر کو چیلنج کیا ہے کہ جنہوں نے ان کی قابلیتوں سے انکار کیا۔

پاکستان پیپلزپارٹی کے چیئرمین بلاول بھٹو زرداری نے مزید کہا کہ مجھے خوشی ہے کہ عورت مارچ کے منتظمین نے پاکستانی خواتین کی محرومیوں اور مسائل کو اجاگر کیا، عورت مارچ کے شرکاء کو نشانہ بنانے کیلئے مخصوص عناصر کی جانب سے توہین مذہب کے قوانین کا غلط استعمال افسوس ناک ہے۔