سینیٹرشبلی فراز نے کہا ہے کہ مولانا فضل الرحمان نے ایک غیر ذمہ دارانہ بیان دیا، مولانا نے کورونا اور ویکسینیشن کے بارے میں غلط بات کی۔

تفصیلات کے مطابق سینیٹر شبلی فراز نے میڈیا سے گفتگو کرتے ہوئے کہا کہ مولانا آپ گمراہ نہیں کرسکتے کیونکہ گمراہ کرنا سیاسی، مذہبی طور پر آپ کو زیب نہیں دیتا جبکہ گمراہ کرنا شیطان کا کام ہے۔

سینیٹرشبلی فراز نے کہا کہ مولانا عوام میں کنفیوژن پھیلا رہے ہیں جبکہ مولانا ایسے اتحاد کی سربراہی کررہے ہیں جو اب رہا نہیں۔

انھوں نے کہا کہ مریم نواز کی پیشی کے حوالے سے انہوں نے آج مریم سے ملاقات کی، کہا گیا مریم نواز کے ساتھ قافلہ احتجاج کرنے جائے گا تو ہمیں اب ان کے لانگ مارچ، سینیٹ میں اپوزیشن لیڈر سے ہمیں کوئی غرض نہیں، آپ پلی بارگین کرلیں آپ کا مسئلہ حل ہوجائے گا۔

انھوں نے یہ بھی کہا کہ یہ کہنا انجیکشن لگانے کے بعد وزیراعظم کو کورونا ہوا درست نہیں کیونکہ ویکسین جب موثر ہوتی ہے جب دوسری ڈوز لگے۔

شبلی فراز کا کہنا تھا کہ وزیراعظم اور خاتون اول دونوں کورونا سے متاثر ہوئے ہیں، ہر طبقہ فکر سے تعلق رکھنے والے افراد نے وزیراعظم کے لیے نیک خواہشات کا اظہار کیا۔

ان کا یہ بھی کہنا تھا کہ کورونا ایک حقیقت ہے افسانہ نہیں، کورونا نہ تفریق کرتی ہے نہ رعایت کرتی ہے جبکہ اس تیسری لہر نے بہت زیادہ متاثر کیا ہے اور متاثرین کی شرح بہت زیادہ ہے۔

شبلی فراز نے کہا کہ وزیراعظم کی ترجیح تھی زندگی اور روزگار دونوں کو چلانا ہے، این سی او سی نے ڈیٹا کی بنیاد پر اپنی حکمت عملی ترتیب دی۔

انھوں نے یہ بھی کہا کہ دنیا کے مقابلے میں یہاں نقصان کم ہوا جبکہ پاکستانیوں کی جانیں بھی کافی محفوظ رہیں اور ہم اسی فلسفے پر قائم ہیں روزگار بھی بچے اور زندگیاں بھی۔

کورونا کی یہ لہر کافی شدت سے آئی ہے، کورونا ویکسینیشن اب دستیاب ہے، شبلی فراز کا کہنا تھا کہ لاہور سمیت مختلف شہروں میں نظم و ضبط کے ساتھ ویکسینیشن کا عمل جاری ہے۔

ان کا یہ بھی کہنا تھا کہ یہ ویکسین بہت موثر ہے،65 سال سے بڑے شہریوں سے درخواست ہے یہ ویکسین لگوائیں جبکہ نجی شعبے کو بھی ویکسین لانے کی اجازت دی گئی ہے۔

سینیٹرشبلی فراز کا مزید کہنا تھا کہ حکومت محدود وسائل کے باوجود ویکسینیشن کروا رہی ہے ، پہلے ہیلتھ ورکرز پھر بزرگ افراد کو کورونا ویکسین لگائی جارہی ہے۔