کورونا کے بڑھتے خطرے کے پیش نظر حکومت پنجاب نے لاک ڈاون میں مزید سختی کردی، سیکرٹری پرائمری اینڈ سیکنڈری ہیلتھ کیئر سارہ اسلم نے لاک ڈاؤن ترمیمی نوٹیفکیشن جاری کر دیا۔

سارہ اسلم نے اپنے ایک بیان میں کہا کہ تمام تفریحی پارک مکمل بند کر دیے گئے ہیں جبکہ پارکس میں صرف واکنگ ٹریک کھلے رہیں گے۔

سیکرٹری پرائمری اینڈ سیکنڈری ہیلتھ کیئر نے کہا کہ شادی بیاہ کی تمام ان ڈور سرگرمیوں پر مکمل پابندی عائد کر دی گئی ہے جبکہ 300  مہمانوں کے ساتھ آوٹ ڈور شادی تقریبات کی ایس او پیز پر عمل درآمد سے مشروط اجازت ہوگی۔

 سارہ اسلم نے یہ بھی کہا کہ تمام کاروباری سرگرمیاں رات 8 بجے بند کرنے کے آحکامات جاری کر دیے گئے ہیں جبکہ ریسٹورانٹس کو ہفتہ کے کاروباری دنوں میں رات 10 بجے تک آوٹ ڈور ڈرائنگ کی اجازت ہوگی۔

سیکرٹری پرائمری اینڈ سیکنڈری ہیلتھ کیئر کا کہنا تھا کہ بین الاضلاع (انٹر سٹی) ٹرانسپورٹ کو 50 فی صد سواریوں کے ساتھ سفر کی اجازت ہوگی جبکہ ریٹیل شاپس کو 70 فی صد افرادی قوت کے کام کرنے کی اجازت ہوگی۔

سارہ اسلم کا یہ بھی کہنا تھا کہ تمام میڈیکل سروسز، فارمیسی، میڈیکل سٹور، لیبارٹریاں، کولیکشن پوائنٹس،ہسپتال اور کلینکس 24 گھنٹے کھلے رہیں گے۔

سیکرٹری پرائمری اینڈ سیکنڈری ہیلتھ کیئر سار اسلم کا مزید کہنا تھا کہ عوام سے گزارش ہے کہ احتیاط کریں، احتیاط بہترین ویکسین ہے، احتیاط نہ کرنے سے کورونا وائرس دوبارہ تیزی سے پھیل سکتا ہے۔