گلگت بلتستان اسمبلی سے متفقہ طور پر گلگت بلتستان کو عبوری صوبہ بنانے کی تاریخی قرارداد منظور کرلی گئی ہے۔

تفصیلات کے مطابق گلگت بلتستان اسمبلی نے جی بی کو عبوری صوبہ بنانے کا مطالبہ کردیا ہے۔

قرارداد میں کہا گیا ہے کہ قومی اسمبلی، سینیٹ ودیگر وفاقی اداروں میں مناسب نمائندگی دی جائے اور عبوری صوبے کا درجہ دینے کیلئے آئین پاکستان میں ترامیم کا بل منظورکرایا جائے۔

قرارداد کے مطابق مسئلہ کشمیر کو متاثر کئے بغیر گلگت بلتستان کو عبوری آئینی صوبہ بنایا جائے کیونکہ گلگت بلتستان کو قومی اداروں میں نمائندگی دینا وقت کی ضرورت ہے۔

قرارداد پر تمام جماعتوں کی جانب سے حمایت کی گئی ہے جبکہ قائد حزب اختلاف گلگت بلتستان اسمبلی نے کہا ہے کہ عبوری آئینی صوبہ کا مسئلہ ہم نے اتفاق رائے سے حل کرنا ہے۔

انہوں نے کہا کہ ماضی میں بھی اس مسئلے پر تمام جماعتوں میں اتفاق رائے ہے اور اب بھی تمام اسٹیک ہولڈرز کو اس پر اعتماد میں لیں گے۔

بعد ازاں گلگت بلتستان اسمبلی کی قرارداد وزیراعظم سیکریٹریٹ کو ارسال کردی گئی ہے جبکہ یہ قرارداد وزیراعلیٰ گلگت بلتستان خالد خورشید نے پیش کی ہے۔